Youq ndaw ndoengfaex hungmbwk he, miz sam duz nyaenma youh dwggyaez youh coengmingz, youq ndawde caemh miz duzguk yakrwix he caezyouq gizhaenx. Duzguk ciengzseiz cungj siengj gaeb gyoengq nyaenma gwn liux bae, hoeng, cungj mbouj miz gihvei. Miz ngoenz ndeu, duzguk yaek nyoengx hai aen dou ranz nyaenma, siengj bongh haeujbae gwn gyoengqde, cingq youq seizhaenx, duzguk deng gyoengq nyaenma fatyienh lo, duzguk deng moeb baenz daengx ndang youh nding youh ndaem, de cijndaej saemxsax buet baema lo.

Duzguk ndaw sim mbouj fug dahraix, de naemj bae naemj dauq, naemj baenz hwnz bae, cij naemj ndaej ok aen geiqmaeuz baenzlawz ndaej gwn gyoengq nyaenma he.

Ngoenz he haetromh, duzguk bae ra daengz lauxdaih nyaenma, de gangj:“Nyaenma daeggo, mwngz yawj, daegngeih caeuq daegsam ngoenz- ngoenz cungj gangj vaihvah mwngz, caiqlix, gyoengqde baenzneix gik, ngoenzngoenz cungj mbouj guhhong siengj beg ndaej gwn. Mwngz mbouj raen gyoengqde dwgcaengz lwi?” Lauxdaih nyaenma dingq le, raen miz dauhleix, doiq gij vah duzguk saenqriri bae.

Duzguk youh bae ra daengz lauxngeih caeuq lauxsam, doiq gyoengqde gangj gij vah doxdoengz nei. Yienghneix, sam beixnuengx de heijdaeuz doxngeiz, boux mbouj leixlangh boux, doeklaeng, gyoengqde gag bae ra gijgwn lo. Duzguk raen miz gihvei lo, couh riengz laeng nyaenma lauxsam, baez coemj gvaqbae, dawz nyaenma lauxsam gyan roengz dungx bae. Duzguk gwn imq le, couh ngauzngwet ngauzngat baema lo.

Siusik gig vaiq couh cienz haeuj aen rwz song duz nyaenma lw roengzdaeuj bae, song duz de fwt singj hwnjdaeuj: Cungj gvaiq swhgeij luenh dingq gij vahsek duzguk, couh hawj duzguk geiqmaeuz ndaej hengz. Song duz de gietdingh caiq doxgiet hwnjdaeuj, caez doiqfouq duzguk dwgcaengz neix.

Ngoenz daihngeih, song duz de youq ndaw ndoeng baijbouh haujlai aen cingj laeg, song duz de youq henz cingj byaij bae byaij dauq. Duzguk baez raen, sikhaek coemj hwnjbae, hoeng, youq baihnaj de miz aen cingj laeg he, nyaenma lauxdaih baez ndoj, duzguk couh doek roengz aen cingj laeg bae dai lo.

Song duz nyaenma neix couh daj ndaw cingj rag duzguk hwnjdaeuj, gyoengqde couh ndaej bang lauxsam bauqcaeuz lo.

Aen goj neix hawj raeuz rox, cijaeu caemhsim doxbang, couh guh ndaej engq ndei.

(lauxsae son’gyauq: Linz Meijgenh/林美娟)