Youq mboengq majhung cungj miz haujlai haujlai saeh, couh lumj baenz roix baenz roix fubfauz geq hix geq mbouj liux, lij yap dwk gij rongh caet saek ndeiyawj. Ndawde miz gienh saeh ndeu sawj gou lumz mbouj ndaej.

Gienh saeh neix dwg gou seiz 7 bi gij saeh ciemz heuj. Miz baez ndeu, gou cingq gwn makcaujheu, sawqmwh gou haeb deng makcaujheu aen ngveih bae, roxnyinh swnj heuj in dangqmaz, gou yungh fwngz menh- menh lumh swnj heuj neix, swnj heuj neix caen ngauz lo! Hwk dwk gou daengx ndang cungj saenz lo, gou gipmuengz bae ra daxmeh, dawz gienh saeh neix lwnh daxmeh nyi, daxmeh riu dwk doiq gou naeuz:“Mwngz siengj ciemz heuj lwi?” Gou mizdi dwglau dwk han naeuz:“Siengj!”Daxmeh ciepdwk hwk gou naeuz:“Danghnaeuz ciemz swnj heuj lo, mwngz couh gwn haeux mbouj ndaej lo, guh gijmaz cungj mbouj ndaej.”Gou dingq le engqgya dwglau lo, gou swenj dwk naeuz:“Gou mbouj ciemz heuj lo, gou mbouj ciemz heuj lo.”Mboujguenj daxmeh baenz- lawz gangj, gou cungj mbouj dingq, doek- laeng daxmeh naeuz:“Daxmeh cijdwg yaeuh mwngz, danghnaeuz mwngz mbouj ciemz swnj heuj neix okdaeuj, de couh itcig maj, maj ndaej lumj swnj heuj duzciengh raez- rangrang bae.”Gou dingq le ndaw sim gig lau dwk cam:“Ciemz heuj in mbouj in ha?”Daxmeh ndiepgyaez dwk naeuz:“Mbouj in mbouj in, seizlawz ciemz cungj mbouj in.”Gangj liuxle daxmeh couh daiq gou haeuj ranz bae yaek ciemz heuj lo.

Daxmeh heuh gou naengh ndei gonq, liuxle heuh gou aj aenbak hung bae. Daxmeh iet fwngz haeuj ndaw bak gou, gaemdawz swnj heuj, seiz haenx gou laep song da mbouj gamj yawj, daxmeh yungh rengz baez fid, couh dawz swnj heuj ciemz okdaeuj lo. Doeklaeng gij lwed ndaw bak doek youq gwnz fwngz gou, gou hai da baez yawj, sikhaek buet haeuj veiswnghgenh riengxbak, cadi laemx bae. Swnj heuj gou ciemz okdaeuj lo, gou angq dangqmaz, hoeng gou baez bae ciuq gingq, swnj heuj ndeu vauq lo, caen yakyawj, youh mizdi ndeiriu ne !

Haha, baez daih’it ciemz heuj, mizdi yungyiemj, hix mizdi dwglau.

(lauxsae son’gyauq: Mungz Cwngz- gen/蒙成建)