Mwngz naeuz haijhung mbouj bien mbouj henz, beixmbauq ha, seizneix raeuz mbouj dwg byaij youq henz raiq ma?

Henz raiq neix couhdwg raiq henz haijhung go.

Mwngz naeuz haijhung daemq gvaq aen ndoibya ranz raeuz youq de, beixmbauq ha, mwngz yawj vei, gizgyae’gyae de, haij mbouj dwg caeuq fwjhau gwnzmbwn doxrangh ma?

Langhnaeuz raeuz riengz raemxlangh haijhung doxbae, byaij baenaj sohsoh, couh ndaej byaij daengz gwnzmbwn sangngaungau miz fwjhau mbin- fofo de lwgo.

Mwngz naeuz haijhung lumj mbaw baengzcouzo ndeu ma, beixmbauq ha, bae gyawz ra ndaej mbaw baengzcouz hung baenz yienghneix ne?

Haijhung gijmaz cungj mbouj lumj.

Haijhung gag lumj bonjndang ndwi.

Haijhung couh lumj haijhung.

（Daj《Bonjsei Sim Lwgnyez》 （Veiz Gizlinz raiz） senj okdaeuj, Luz Fwncangz hoiz）