Duzlingz vuengz ra ndaej aen gvehoengz ndeu, hoeng, baenzlawz gwn ne? Duzlingz neix coengzlaiz mbouj caengz gwn gvehoengz gvaq. Sawqmwh, de siengj daengz aen geiqmaeuz ndei ndeu, yienghneix de couh heuh gyoengq duzlingz daeuj caez.

De cingcing conghhoz:“Ngoenz- neix, gou ra ndaej aen gvehoengz hung ndeu, caiq gangj baenzlawz gwn gvehoengz ma, gou dangyenz……dangyenz dwg rox ne. Danhseih, gou yaek sawq gij dungxcaiz sou, yawjyawj byawz gangj ndaej ok gij fuengfap baenzlawz gwn gvehoengz haenx. Langhnaeuz gangj ndaej ngamjdeng le, gou couh lai ciengj de dip ndeu. Langhnaeuz gangj loek ne, gou couh fad de.”

Gyoengq duzlingz mwngz yawj- yawj gou, gou yawjyawj mwngz, byawz hix mbouj caengz gwn gvehoengz gvaq.

Duzlingz iq ndeu yaepyaep da, nyaujnyauj gemj, naeuz:“Gou rox, gwn gvehoengz dwg gwn noh.”

“Mbouj deng！De gangj mbouj deng!”Duzlingz riengndoq diuq hwnj- daeuj:“Gou lij iq seiz caeuq daxmeh bae ranz mehdaiq, gwn gvaq gvadiemz, gwn gvadiemz dwg gwn naeng. Gou yienghneix naemj, gvadiemz hix dwg gva, gvehoengz hix dwg gva, gwn gvehoengz ma, dangyenz caemh gwn naeng lo.”

Seizneix, daihgya doxeuq hwnj- daeuj, mizdi gangj：“Gwn gvehoengz dwg gwn naeng!”Mizdi gangj:“Gwn gvehoengz dwg gwn noh!” Hoeng, doxceng le buenq ngoenz, hix mhouj rox dauqdaej baenzlawz gwn, yiengh- neix aen da daihgya cungj yawj coh duzlingzgeq…… Duzlingzgeq nyinh- naeuz dwg seizhaeuh oknaj daeuj lo, de rubrub mumh, cingcing singhoz naeuz：“Gwn gvehoengz ma dang- yenz……dangyenz dwg gwn naeng lo. Gou daj iq couh gyaez gwn gvehoengz, caiqlix……caiqlix soqlaiz cungj dwg gwn naeng. Gou ngeix, gou vihmaz laux lo hix mbouj dai, couhdwg aenvih gou gwn naeng gvehoengz……”Daihgya cungj hemqhuhu hwnjdaeuj:“Deng! Gwn gvehoengz aeu gwn naeng!”“Gwn gvehoengz aeu gwn naeng!”……

Duzlingz vuengz laihnaeuz ra daengz dapanq lo, de ndwn hwnjdaeuj, yiengq baihnaj baez yamq, hai bak gangj:“Deng! Daihgya gangj ndaej deng! Gwn gvehoengz dwg gwn naeng. Hw, couhdwg duz lwg fangzbyaiz neix bouxdog gangj dwg gwn noh gva, yienghneix couh hawj de gwn ba! Raeuz gwn naenggva!”

Aen gvehoengz deng mbat cax ndeu couh buq baenz song mbiengj, duzlingz iq gwn noh gva. Gyoengq duzlingz wnq cungj caez faen gwn naeng gva……

Miz Duzlingz ndeu gwn le song gaemz, couh gyongzgyongz duzlingz henz ndang naeuz:“Ai, gou roxnyinh gij feihdauh mbouj baenzlawz yiengh ha!”

“Hai, lauxnuengx, gou ciengz gwn gvehoengz, gvehoengz ma, feih- dauh couhdwg yienghneix lo……”

(lauxsae son’gyauq: Vangz Vazyen/黄华艳)