Gou miz boux daxbuz nyaengq guh mbouj daengx ndeu, ngoenz- ngoenz daj haet daengz haemh nyaengq mbouj daengx, danhseih mbouj caengz nyi de ienq saek coenz.

Banhaet romh, gou lij ninz youq gwnzmbonq loqhwnz seiz, daxbuz couh hwnq lo, cawj ngaizoemj hawj gou caeuq dahmeh, ciuq sibgvenq daxgoeng cawj gyaujswj. Daxbuz rox daxboh ceiq maij gwn mienh, ndigah youq daxboh hwnq gaxgonq, couh cawj ndei mienh lo.

Gwn liux ngaizromh, dou cungj ok rog bae lo, ndaw ranz dan lw daxbuz caeuq daegnuengx iq lo. Daxbuz coengh daegnuengx iq catheuj、swiqnaj, bwnq de gwn- ngaiz, saeg buhvaq iq de. Guhsat gijneix liux, daxbuz lij mbouj lumz caeuq daegnuengx iq guhcaemz yaep ndeu.

Daengz banhaemh, daxbuz youh hainduj bwh ngaizcaeuz cienz ranz lo. Gou cuengqhag caeux, daxbuz couh hawj gou caeuq daegnuengx iq gwn gonq. Caj daxboh、daxmeh、daxgoeng cungj dauq daengz caez lo, daxbuz cij naengh roengzdaeuj caeuq daihgya doengzcaez gwn.

Langh cuengqgyaj le, gou couh iugouz daxbuz dawz gij saeh ganq daegnuengx iq haenx gyau hawj gou guh, neix hawj daxbuz ndaej yietnaiq ndei, soeng baez ndeu. Danhseih, daxbuz cungj naeuz：“Gou boux ndeu gag nyaengq couh ndaej, mwngz vaiq bae sij cozyez ba.”

Neix couhdwg daxbuz gou——saeqsim、gaenxguh youh depgyawj. Daxbuz, gou gyaez mwngz!

(Cangh Mungyauz)