Ranz gou ciengx miz duz douqhau iq ndeu, de dwggyaez raixcaix.

Douqhau iq gaiqrwz raezrangrang, daengx ngoenz daengj youq song mbiengj gyaeuj, lwgda hung hoengzfedfed, sijsaeq yawj, mwngz itdingh laihnaeuz doiq lwgda de couh lumj song naed rinbauj hoengz ne, aen ndaeng de baenz yienghsamgak, baihlaj ndaeng couh dwg aen bak iqetet, gok bak song mbiengj miz geij diuz mumh raez, gwnz ndang bwn hausagsag, bwn diuzrieng fongxfwdfwd. Miz seiz de gungj aen ndang hwnjdaeuj, caen lumj aen giuzhau ringx youq henz gungxciengz ne! Gij yiengh duz douqhau iq dwggyaez lai ha!

Douqhau iq gij yiengh gwn doxgaiq couh engq mizyinx lo. Gijgwn de coengzlai mbouj rox yiemz, de cij gwn di byaek couh ndaej baenz donq lo, gij byaek couh dwg lauxbaeg、byaekhau caeuq nywjheu, caemhcaiq gaeu duhdoem ro caeuq gaeu maenz ndengj hix ndaej gwn guh donq dem. Gou ciengzseiz bae rog beng di nywjoiq dauqma hawj de gwn. Douqhau iq baez gwn doxgaiq, aen bak song mbiengj cungj dwg bongz hwnj mboep roengz, geij diuz mumh haenx hix doenghyamyam. De gwn imq le, cungj gyaez aeu song gaiq nyauj naj uetuet aen bak iq, youh dawz henz ndang cingjleix seuq bae. Gou sim siengj, neix dwg aenvih duz douqhau iq neix gyaez dieg seuq ba, de itdingh dwg siengj hawj aen dieg youq de bienq ndaej seuqsetset bae.

Douqhau iq ninzndaek seiz, gij yiengh hix gig ndeiriu. De cungj dwg ngengq ndang ninz, aen ndang gungj dwk, seiq gaiq din suekngeuj. De fangzhwnz seiz, dinzfwngz cungj saenzdedded, aen gyaeuj doengh bae doengh dauq, menhmenh dwk, aen ndang hix gaen dwk doengh hwnjdaeuj, doeklaeng, geij diuz mumh hix doengh lo, yawj gij yienghceij de, mwngz itdingh gig siengj hemq singj de.

Duz douqhau iq ranz gou caen dwggyaez ha! Siuj baengzyoux, mwngz itdingh hix gig siengj ciengx duz ndeu ba!

（lauxsae son’gyauq: Cuh Veimingz/朱卫明）