Haemh ronghndwen caem- rwkrwk nei. Ronghndwen hausak unqswnh ciuq coq gwnz daiz- cueng, gapbaenz fuk doz haemh roenghndwen gyaeundei ndeu. Seiz neix, gou cingq youq ndaw caemrwk neix simcaem hoz- maez.

Youq gwnz mbaw baengz mbwnlaep, doengh aen ndaundeiq iq lwgda yaepyaep yekyek okdaeuj lo. Gyoengq ndaundeiq youq gyang mbwn baez yaep baez yaep, lumj han raeuz camndei. Gyang mbwn miz geij duj fwj iq menh byaij menh bae, lumj diuz saicouz nei, dang doengh ndaundeiq hawj gyoengqde fwd ndoj fwd ok, yawj hwnjbae lumj caeuq vunzlai guh gaemhndoj nei.

Dahcej ronghndwen daenj ndangdaenj lamzoiq, riunyumj baez ndeu, loh heuj haungaenz okdaeuj. Youq henz ndang de cingq biufouz miz di fwj mbang ndeu. Gyoengq fwj de daenj gien vunjsa mbang youh mbaeu youh hau ndeu, biu bae biu dauq, lumj dahsien diuqfoux nei.“Gyoengq dahsien”lau rongh- ndwen mbouj miz rengz, ndigah daeuj bengdaz de; lau ronghndwen gagdog, ndigah daeuj buenx de.

Youq haemh caemrwk neix, dahcej ronghndwen caeuq gyoengq ndaundeiq doxbangx doxbuenx, ciengq go’ngauzlamq, laeglemx gangjgoj. Yienghneix le, de mbouj gagdog lo. Vunz gwnz deih ngiengx gyaeuj muenghyawj mbwn ndau- ndeiq. Mbwn ndaundeiq yawj hwnjbae saenzmaed dangqmaz, vunz couh bien haujlai gojgaeq sengdoengh yinxvunz.

Mwngz yawj, mbwn ndaundeiq gyanghaemh gyaeundei dangqmaz! Youq gyang mbwn youh ndaem youh lamz, miz rim ndaundeiq ronghrigrig, lumj baez naed baez naed raemx rongh saekngaenz; venj miz aen ronghndwen gaeuzgege nei, lumj aen makgai deng mbwn haemh haeb gaemz ndeu……Gou bomq youq henz daizcueng, ngeix sam ngeix seiq.

(Dingh Cinz)