Ngoenzsinghgiz, daxmeh deng bae gunghswh gyaban, gou caeuq daxboh doxyaeng, doengzcaez riengz daxmeh bae “hwnjban”, caenndang bae yawj daxmeh hwnjban nyaengq guh gijmaz lai.

Ma daengz ranzbanhgoeng, gou yawjraen gwnz daiz daxmeh cungj dwg bouhsoq, gwnzde raiz gij soq ndaej deihdwddwd bae. Gou gaem hwnj bonj bouh ndeu cam daxmeh: “Gij cihsoq neix dwg gijmaz eiqsei?” Daxmeh biengj hai yieb daih’it naihsim lwnh gou, gijneix cungj dwg moix ngoenz gij soq baengz haeujcang. Daxmeh vix aen cihsoq 2 hangz daih’it, lwnh gou aen neix eiqsei dwg singhgizit haeujcang 2 fanh mij baengz. Gou raen hangz daihngeih dwg 5, hangz daihsam dwg 4, itcig daengz hangz daihcaet, yienghneix couh geq hwnjdaeuj:2,5,4,2,6,8,5. Daxmeh raen gou geq ndaej hwnjyinx, cam gou: “Mwngz suenq ndaej ok aen singhgiz ndeu gungh haeujcang geijlai mbouj?”

Gou cingq nyeng gyaeuj naemj dapanq ne, daxboh gvaqdaeuj gyawj naeuz: “Menhmenh guh, gaej gaenj, raeuz baenz aen baenz aen gya soq.” Gou raiz sojmiz cihsoq roengz gwnz ceij bae, lied ok aen suenqsik: 2+5+4+2+6+8+5=?

Raendaengz aen suenqsik baenzlai raez, gou cingq dajsuenq baenz aen soq baenz aen soq gya hwnjdaeuj, sawqmwh naemjdaengz lauxsae gangj gvaq “fap gap cib”, suenqsik ndawde 2 caeuq 8、5 caeuq 5、4 caeuq 6 cungj ndaej gap baenz 10, itgungh miz sam aen 10, doeklaeng caiq gyahwnj 2, gou miznaj dangqmaz lwnh- naeuz daxmeh gungh haeujcang 32 mij baengz.

Bonjlaiz muengh naeuz daxmeh haengjdingh haenh gou suenq ndaej vaiq, siengj mbouj daengz daxmeh dauq riuhaha hwnjdaeuj, nanzdauh dwg gou suenq loek la? Daxboh youq henz hix riu naeuz: “Aen singhgiz ndeu ngamq haeujcang 32 mij baengz, danvih yaek daiiek lo!” Dingqnyi daxboh yienghneix gangj, gou sikhaek mingzbeg lo, gipmuengz sing hung dwk niujcingq naeuz: “Dwg 32 fanh mij baengz!”

（Yenz Yihnoz raiz Ouh Caijfangh hoiz）