Ndwenngoenz gvaqbae lumj raemxlae, hawj gou geiq mbouj ndaej saeh gaxgonq lo. Hoeng miz gienh saeh ndeu, moix baez ngeix daengz le, ndawsim gou cungj raeujrubrub hwnjdaeuj.

Miz ngoenz ndeu banringzgvaq, daxmeh heuh gou cuengqhag le gag naengh gunghgyauhceh ma ranz. Gou sim diuqbubbub, lau swhgeij mbouj rox naenghci, hoeng ciuhvunz raeuz haujlai saeh cungj miz baez daih’it, gou couh daih’it baez gag naenghci bae ranz ba.

Cuengqhag le, gou daeuj daengz gunghgyauhcan, ndaw fwngz gaem- dawz mbaw 5 maenz ngaenz ndaet- ndaet bae, gou hawj swhgeij baemheiq: Mbouj lau, cijdwg naengh gungh- gyauceh, miz maz dwglau ne? Seizgan miux gvaq faen bae, mbouj rox seizlawz, gvaqbae 40 faencung lo, gunghgyauhceh vihmaz lij mbouj caengz daeuj ne? Gou gip baenz soh caemq din. Mbwn menhmenh laep lo, gou ndawsim engqgya lau lo, daengx ndang cungj saenzdaeddaed bae.

Seizhaenx miz gyaq ci ndeu hai gvaqdaeuj, gou laihnaeuz dwg gungh- gyahceh, fwd soengz hwnjdaeuj, yungh rengz gaemndaet mbaw 5 maenz ngaenz, yaek hwnjci bae. Hoeng gyaq ci neix mbouj dwg gunghgyauhceh, ndawsim gou couh lumj aen giuznaeng deng cim camz nei, daengx ndang cungj unq liux lo. Mbwn yied daeuj yied laep, gou cungj mbouj rox baenzlawz guh. Sawqmwh, miz gyaq ci ndeu youq henz gou dingz roengz- daeuj, bouxswhgih iet gyaeuj okdaeuj, heuh gou naeuz:“Daegnuengx iq ha, hwnj daeuj ba, gaej youq gizneix caj lo, seizneix mbouj miz gunghgyauhceh lo, gou soengq mwngz baema ranz.”Gou mizdi lau, ndawsim naemj：De dwg mbouj dwg bouxyaeuhvunz, langhnaeuz dawz gou bae gai, baenzlawz guh ne? Swhgih lumj yawj ok ndawsim gou ngeix gijmaz nei, naeuz:“Cuengqsim ba, gou mbouj dwg bouxyaeuhvunz.” Gawq vah neix couh lumj naed ywdinghsim, gou yawj dwk aen da swhgih caensim dahraix, yienghneix gou couh yamq din hwnj ci lo. Youq gwnz ci, swhgih cam gou ranz youq gizlawz, heuh gou naengh ndei. Doeklaeng swhgih soengq gou ancienz daengz ranz lo. Muengh dwk gijngaeuz swhgih haici lizbae, ndaw- sim gou gamjdaengz raeujrubrub. Aen seiqgyaiq neix dwg vunzndei lai ha.

Gienh saeh neix gvaqbae haujlai nanz lo, hoeng gou cungj geiq youq ndawsim maenh bae, neix hawj gou ciuhvunz lumz mbouj ndaej.

（lauxsae son’gyauq: Vangz Gveiyangh/黄桂香）