Miz ngoenz ndeu haetromh , gou ngamq ninzndiu, dingqnyi ndaw ranzdajcawj gij singyaem“bizliz bazlaz”, roxnyinh geizgvaiq lai：“Daxmeh guh gijmaz ne?” Seizhaenx, miz heiqhom ci gvaqdaeuj. Yienzlaiz dwg heiq hom gij simnyemh gyaujswj. O, ngoenzneix daxmeh guh gyaujswj.

Gou sikhaek hwnjndang, buet coh ranzdajcawj. Daxmeh caeuq dahcej cingq cauj gij simnyemh gyaujswj ne. Daxmeh raen gou daeuj lo, couh mizdi ndaenggon le doiq gou gangj:“Baenzlawz yiengh, hom mbouj hom ha? Raeuz yaek guh gyaujswj lo.”“Hom, hom dahraix, gou hix yaek guh gyaujswj.”Gou han daxmeh, myaiz yaek doek lo, couh siengj sikhaek ndaej gwn gyaujswj couh ndei lo.

Gou ciuq daxmeh guh, dawz naeng gyaujswj mbe youq gyang fwngz, daek gij simnyemh coq gwnz naeng gyaujswj, doiq ciep, nyaenj henz, fung bak. Song mbaek baihnaj guh ndaej gig ndei, hoeng doeklaeng nyaenj naeng fung bak baenzlawz guh cungj mbouj ndei ne? Mbouj dwg nyaenj vaih henznaeng, couhdwg deng naeng nem fwngz gou, gij simnyemh mbouj dwg daj mbiengj haenx roh okdaeuj, couh dwg daj mbiengj neix conh okdaeuj, caencingq dwg“simconh” lo. Yienznaeuz dawz henznaeng gyaujswj nyaenj ndei lo, hoeng nyaenj ndaej gij yienghceij gyaujswj mbit sam mbit seiq, yakyawj raixcaix. Daxmeh caeuq dahcej raen le cungj riuhaha hwnjdaeuj. Daxmeh lwnh gou:“Sien daek vanj raemx ndeu daeuj, aeu lwgfwngz yomx di raemx le, caiq cat haeuj henznaeng gyaujswj bae, yiengzhaeuh nyaenj ndei bae, baujcingq naeng gyaujswj mbouj nem fwngz lo.”Gou ciuq daxmeh gangj haenx bae guh, lai ndei bau dahraix lo. Hoeng, baenzlawz cungj mbouj beij daxmeh caeuq dahcej bau ndaej ndeiyawj. Daxmeh gujli gou naeuz:“Mbouj youqgaenj, bau lai le couh bau ndaej ndei lo.” Gou youh laebdaeb bau gyaujswj.

Gyaujswj cawj ndei lo, daxmeh caeuq dahcej cungj ceng gwn gij gyaujswj gou bau haenx. Gyoengqde naeuz gou bau gij gyaujswj haenx daegbied ndeigwn. Gou dingq le ndawsim gig angq, hix gwn le vanj hung ndeu.

Haha, caeuq vunz ndaw ranz guh gyaujswj gwn gyauswj, caen haisim ha!

（lauxsae son’gyauq: Mungz Cwngzgen/蒙成建）