Ranz gou ciengx miz duz ma ndeu, de daengx ndang bwn hausaksak, diuzrieng dinjdetdet, doiq rwz gig raeh, song aen lwgda ndongqliklik dwk cimyawj seiqhenz, gou heuh de guh “Daeghau”.

Daeghau dwggyaez lai lo. Bingzciengz gou cuengqhag dauqma seiz, de cungj bibi diuzrieng buet gvaqdaeuj coh gou, lumjbaenz doiq gou naeuz：“Angqcoux bouxcawj iq dauqma!” Gou rubrub aen gyaeuj de, de couh sim’angq dwk heux gou baetbaet rieng, ngiengxngiengx gyaeuj. Daeghau gig maij gwn baubyaek, moix baez daxmeh riuj aen swxiq bae haw dauqma, Daeghau cungj dwg boux daih’it buet daengz dangqnaj daxmeh, song aen lwgda ndongqliklik lumj rox gangjvah ityiengh muengh daxmeh. Daxmeh daegdaengq mbouj hawj de gwn, de couh guh gij yiengh mbouj angq, lij “vou vou ”dwk raeuq mbouj dingz, daxmeh mbouj miz fap lo, cijndaej hawj aen baubyaek de gwn. De raen daxmeh daj ndaw swxiq gaem aen baubyaek okdaeuj, couh lumj duz nyaenma iek ityiengh diuq hwnj- daeuj ciengj aeu gijgwn, liuxle ndoj youq giz ndeu, miz feih fwdfwd dwk gwn hwnjdaeuj.

Daeghau mboujdan dwggyaez, lij gig souj aen hong bonjfaenh. Moix haemh, de cungj dwg ninz youq henz bakdou hung ranz gou, song gaiq rwz de gig lingz, cijaeu dingq raen di sing ndeu, couh “vou vou” raeuq mbouj dingz. Caj dou hai dou okbae yawj- yawj seiqhenz ranz, lij doiq de naeuz：“O, Daeghau, mbouj miz gijmaz saeh, mwngz cuengqsim ba!”De cij bibi diuzrieng, ngaekngaek gyaeuj, sim’onj bae ninz lo. Daxboh daxmeh ciengzseiz haenh Daeghau, gangj de dwg Bouxbing cungcig souj aen ranz dou.

Daeghau geijlai dwggyaez ha,gou maij duzma ranz gou.

（lauxsae son’gyauq: Luz Haij- ginz/陆海琴）