Dahcej ngoenzlwenz daj ndaw singz dauq ranz lo, lij daegdaengq cawx duz gaeq hau ndeu caeuq di byaek ndeu guh hojgoh, yienghneix guh dwg hawj daxmeh gvaq ngoenzseng, hix angqhoh gou baez neix doenggvaq gaujsi.

Banringz gvaq sam diemj lai, daxmeh caeuq dahcej cawj ndei ngaiz byaek lo, dou ranz vunz ndeu doq gwn gij byaek nanz mbouj ndaej gwn haenx, doq yawj densi, vuenyungz dangqmaz. Cingq gwn ngaiz seiz, sawqmwh duzma ranz aungeih daeuj lo, gou cingq henx gaiq nohgaeq ndeu liux, duzmaz cimyawj gou, gou rox de naemj gwn ndok, couh gveng ndok hawj de, duzma ciep ndaej ndok liux mbouj raen lo. Youh gvaq yaep ndeu, de youh dauq daeuj lo, gamz gaiq ndok ndeu youh bae lo, baez youh baez dem, sawqmwh, gou roxnyinh duzma neix ngoenz neix mbouj lumj doenghbaez, gij ndok de gamz bae haenx daengz gizlawz ni? Gou yaek ra aen dapanq neix okdaeuj. Duzma daeuj lo, gou ra ndaej gaiq ndok youh hung youh daiq noh ndeu vut hawj duzma. Duzma ciep ndaej ndok liux ngeux gyaeuj couh bae, gou cuengq vanj roengz, ganjgip riengz laeng duzma saenzmaed neix, daengzlaeng daengx roengzdaeuj lo, gou sim geizheih dwk raen: Duzma dawz gij ndok ngamq gamz daeuj haenx soengq hawj doengh malwg swhgeij, haj duz ma’iq ciep le gaiq ndok, youh buet youh diuq doxdawz gwn, mwngz gaemz ndeu, gou gaemz ndeu, sim’angq vuenyungz dangqmaz……Yienz- laiz, duzma moix baez gamz ndok daeuj cungj soengq hawj malwg, hungmbwk lai! Gou sawqmwh ngeix daengz, dahmeh hix yienghneix, dawz doenghgij bingzgoj vunz soengq hawj haenx suek hwnjdaeuj yo ce, dan caj dahcej caeuq gou dauq ranz gwn.

Yawj le duz- mameh, yawj le duz- mazlwg de, ndaw rwz dingqnyi gij singriu dahcej caeuq daxmeh gangjriu gwnngaiz, gou lwgda hainduj roenx ok raemxda, gij raemxda neix lae daengz ndaw bak, diemz dangqmaz.

（Cangh Gyazsinh）