Miz ngoenz ndeu, gou caeuq bouxdoengzdaiz doxceng lo.

Ngoenz haenx, miz ciengz gaujsi ndeu. Gaujsi seiz gou bungz diuz daez hoj ndeu, baenzlawz cungj guh mbouj ok. Gou laeglemx cam bouxdoengzdaiz：“Mwngz lwnh aen dapanq diuz daezmoeg neix hawj gou ndaej lwi?”

Bouxdoengzhag da caengz gou baez ndeu, lej sing naeuz：“Veij! Mwngz aeu ndiu di, neix dwg gaujsi bw!”Gou naemj guh ok diuz daez neix lai, neix le couh caegcaeg fan saw yawj, ra daengz aen dapanq diuz daez neix lo. Yienghneix, gou angqvau dwk cau hwnjbae. Aenvih gaujsi gaxgonq daxmeh naeuz gvaq, gou langh gauj ndaej daih’it, couh hawj gou cawx aen danci moq ndeu. Doeksat, gij saeh neix deng boux- doengzdaiz gou yawjraen lo. Roengz- dangz lo, de gienq gou bae“gag nyinhloek”.

Gou hozhwnj fozfoz dwk caeuq de naeuz：“Gven mwngz maz saeh!”Daj seizhaenx le, gou couh guhyiengh caeuq de doxduenh bae, lai baez vit vwnzgi、dozveh de, roxnaeuz sik saw de. Hoeng de mbouj dawz haeujsim saek di, lij nanz mbouj nanz daezsingj gou“aeu guh bizgi”“fan saw la”daengjdaengj.

Geij ngoenz le banringzgvaq, de caeuq gou gangj：“Mwngz ceiqndei lij bae‘gag nyinhloek’ba! Gou gaenq dawz‘saeh’mwngz lwnh lauxsae lo. Lauxsae naeuz mwngz langh bae‘gag nyinhloek’, de couh yienzliengh mwngz lo.”

Gou youh hozgig youh ndatheiq, simcingz mbouj onj dwk bae daengz ndaw bangunghsiz lauxsae, yiengq lauxsae nyinhloek lo, caemhcaiq baujcingq gvaqlaeng itdingh mbouj baenzneix guh lo. Lauxsae hozraez vahnaek doiq gou naeuz：“Mwngz yiengq gou nyinhloek gou sim’angq dangqmaz……”Daj gij vah lauxsae ndawde, gou yawj ok lauxsae goxgonq mbouj rox gij saeh gou caeg yawj saw.

Bonjlaiz, bouxdoengzdaiz mbouj caeg gangj saeh laeglemx gou gvaq. Yienghneix le, gou ndawsim ngeix mbouj cingjcuj couh vaiqvaiq yamq buet bae gyausiz, ra daengz boux- doengzdaiz, cam de：“Mwngz vihmaz yaeuh gou?”

Bouxdoengzdaiz lejlej naeuz：“Gou cij hawj mwngz rox, gijmaz beij faensoq lai naek.”(Lij Yinhyenz)