Muengh ha muengh, dauqdaej caj daengz ngoenzseng 9 bi gou lo, hix caj daengz ngoenz seizcou ndaej bae youzlangh lo. Miz bouxlawz youq ngoenz seizcou bae youzlangh seiz gvaq ngoenzseng ne? Gijneix gyoengq doengzhag cungj mbouj miz bouxlawz ginglig gvaq ba!

Ngoenzneix, nditrongh raeujrub, cingq dwg ngoenz ndei bae youzlangh ne. Dou daengx ranz vunz naengh ci, miz gangj miz riu dwk, bae daengz Dunghhuz Gunghyenz. Dahnax daiq dou gyoengq lwgnyez guh’angq, mwngz buet gou gyaep, riuhaha dwk, daihgya hanh lae hanh conh, gwnz naj cungj riunyumj. Seizgan gvaq ndaej caen vaiq, mbouj caengz roxnyinh gijmaz daengngoenz couh doek roengz baihbya lo, mbwn fuemx roengzdaeuj lo. Daxboh daxmeh lienzmuengz dawz fan youzceij okdaeuj bu youq gwnz namhbingz, gou caj mbouj gib dwk dawz aen dangauh ngoenzseng okdaeuj, dahcej ganjgip diemj hwnj labcuk. Dahnuengx caeuq daegnuengx mbouj yungh iu cix doengzsing ciengq hwnjdaeuj：“Hoh mwngz ngoenzseng vaiqlag！Hoh mwngz ngoenzseng vaiqlag……”Ciepdwk daihgya cungj gaen dwk angq ciengq hwnjdaeuj lo. Gou laep hwnj lwgda, ndaw sim laeglemx siengj aen simnyienh ndeu, cingq yaek aeu boq labcuk seiz, sawqmwh, raq rumz ndeu ci gvaq- daeuj, bang gou dawz labcuk ci ndaep lo. Daxboh naeuz, yienzlaiz dahsau seizcou hix daeuj coengh gou gvaq ngoenzseng ne! Daihgya dingq le cungj humx gou bekfwngz hwnjdaeuj. Gou sim’angq dwk gat dangauh ngoenzseng, faen hawj daihgya gwn, gij yiengh daegnuengx dahnuengx caen ndeiriu, song boux de aeu fwngz vaz dangauh gwn, ndaw bak nyaed rim dangauh, bongzbwdbwd, gwnz naj gwnz gyaeuj lij nem miz dangauh ne, daihgya yawjraen lo, youh riuhaha hwnjdaeuj……Mehsimj sikhaek aeu soujgih ingj aen ciengzmienh angq- yangz neix roengzdaeuj.

Gwn dangauh le, dou youh gwn aenmak. Doeklaeng, daihgya dawz labsab gip seuq beuj ndei, couh angqyangyang dwk naengh ci dauq- ma lo.

Baez ngoenzseng neix gig geiz- leix, nauhnauh yiedyied, angqangq yangzyangz, gou aeu dawz de sij roengzdaeuj, geiq haeuj ndaw sim bae.

（lauxsae son’gyauq: Cinz Cinh- donz覃珍团）