Dahnuengxbiuj gaenq ndaej song bi lai lo, gangjvah caengz bienz, gyoengq vunzhung dingq le, cungj mbouj rox de gangj gijmaz, ndeiriu dangqmaz.

Miz ngoenz ndeu, mehgux bae haw cawx doxgaiq，heuh gou ganq dahnuengxbiuj. Gou couh caeuq dahnuengxbiuj caez guhcaemz. Mbouj yaep ndeu, dahnuengxbiuj naeuz:“Youznaij, youznaij……”Gijmaz? Gou cungj dingq mbouj rox, mbouj rox de naemj aeu gijmaz. Dah- nuengxbiuj raen gou mbouj hawj de, vix gwnz daiz:“Youznaij, youz- naij……”Gou yawj coh gwnz daiz, miz bingz cijvaiz ndeu. O, gou rox le, dwg cijvaiz. Gou dawz diuz guenj cap haeuj ndaw bingz, hawj dahnuengxbiuj gwn, dahnuengxbiuj mienh gwn mienh riu.

Gwn liux cijvaiz, dahnuengx- biuj youh naeuz :“Densin，Densin”Gou laihnaeuz dahnuengxbiuj aeu gwn bingj, couh dawz aen bingj hawj de, hoeng dahnuengxbiuj aeu fwngz faet deuz, ngauz gyaeuj naeuz：“Yawj densin, yawj densin.”Gou saeqsim baez dingq, yienzlaiz dahnuengxbiuj aeu yawj densi ya. Yienghneix, gou couh hai densi hawj dahnuengxbiuj yawj.

Yawj ndaej yaep ndeu, dah- nuengxbiuj youh naeuz：“Suiz……suiz……”Gou doeksaet yat, daj gwnz sahfaz gingj roengzdaeuj, byawz ……byawz cung haeujdaeuj lo? Yawjyawj mbouj miz vunz, sijsaeq ngeix cij rox dahnuengx- biuj aeu gwn raemx. Gwn raemx sat, nuengxbiuj youh naeuz：“Niuj……niuj……niuj”Gou dingq haujlai nanz, hix dingq mbouj rox dahnuengxbiuj gangj gijmaz, dahnuengxbiuj simgip le daej hwnjdaeuj, buekmingh swenj hwnjdaeuj：“Niuniuj, niuniuj……”Baenz neix gou rox lo, dahnuengx- biuj aeu oknyouh, yienghneix，gou couh daiq dahnuengxbiuj bae haexgaeng oknyouh.

Ai, ganq lwgnyez caen mbouj yungzheih ha.

(lauxsae son’gyauq: Vangz Gveiyangh/黄桂香)