Biekbya mbouj dwg gijgwn ceiq ndeigwn, hoeng dwg gijgwn gou ceiq maij. De mbouj beij nohbya singjsien baenz- gwn, mbouj beij gagaeq feihdauh noengz, mbouj beij gijgwn ndawhaij lwenqda, hoeng de ciengx- lwenx dwg gijgwn ceiq ndeigwn. Aenvih de hawj gou rox miz gij gyaez daxboh noengzna.

Ngoenz haenx, gou geiq ndaej cingcuj dangq- maz, dwg banhaemh seiz- doeng, aenmbwn laepngaungau ne, fwj- ndaem rim mbwn, seiz mbouj seiz doek geij naed fwn.

Cuengqhag lo, baihnaj dou hagdangz cungj dwg gyoengq bohmeh daeuj coux lwgnyez. Gou doidoi nyoengx- nyoengx saenx gvaq gyang vunzlai bae. Youq ndaw rumz, boux vunz dasug ndeu cingq ndwn youq gizhaenx, ndangdaenj caeuq byoem cungj deng rumzhung ci le hwnjhwnj roengzroengz. De lumjnaeuz dwg yawjraen gou lo, lej buet daeuj coh gou, gou hix yamq hung byaij bae coh de.

“Nit lwi? Gvaqdaeuj daenj geu ndangdaenj ndeu.”Daxbuz yousim dwk muengh yawj gou, daj ndaw daeh fwngzswix gaem haenx dawz ok geu buhraizgek ndeu ndenq hawj gou.“Daehsaw ce gou aemq!”De dawz aen daehsaw gou roengz gwnz mbaq gou daeuj, aemq coq baihlaeng de.

Gou dued daehsaw dauq, naeuz： “Gou gag aemq la!”“Mwngz dwg mbouj dwg nyinhnaeuz daxbuz geq lai? Naj nyaeuq lo? Mbouj miz yungh lo?”Gou raen daxbuz aen lwgda geq de ronghrikrik nei, gig ndatcingz dwk yawj gou.

“Mbouj, mbouj, mbouj dwg, mwngz aemq ba.”Gou guhmuengz naeuz.

Daxbuz doiq gou riuriu le naeuz:“Dungx iek luba? Daeuj, gwn biekbya!”Gangj seizhaenx lumj miz fapfangz dwk daj ndaw rungj de yut ok aen biekbya gaenq gyoet gvaq,“Gyoet gvaq mbw!”Daxbuz gangj seizhaenx aeu fwngz upup le biekbya, youh hah song gaemz heiqndat coq de, ndenq daengz ndaw fwngz gou. Ciep ndaej aen biek gyoet, gou lejlej haeb song gaemz, hoeng raen de raeuj dangqmaz, baenzgwn raixcaix.

De beij nohbya lai singjsien baenz- gwn, beij gagaeq feihdauh lai noengz, beij gijgwn ndawhaij lai lwenqda. Gijgwn gou ceiq gyaez gwn haenx dwg biekbya! De sawj gou ciengxlwenx geiq maenh gij gyaez daxbuz.

（Cuh Cwzyenz raiz Daegngingh hoiz）