Bineix seizdoeng gou cungj caj mbwn doek nae, caj haujlai haujlai nanz, mbwn doek nae lo! Gou lwnh daxboh, gou siengj okbae caemz nae. Daxboh ngaekgyaeuj lo, daengq gou gag yawj soujbyauj, aeu youq banringz cibngeih diemj cibhaj faen dauq daengz ranz.

Gou youq ndaw siujgih caemz nae caemz ndaej angq dangqmaz, danhseih ndawsim dingj geiq seizlawz dauqbae ranz. Gou baez daih’it yawj soujbyauj, soujbyauj dwg cibngeih diemj lingz caet faen. Gou caemz yaep ndeu, liuxle baez yawj soujbyauj lij dwg cibngeih diemj lingz caet faen. Gou youh caemz yaep ndeu, liuxle baez daihsam yawj soujbyauj, baenzlawz lij dwg cibngeih diemj lingz caet faen? Gou hoz ngeix: Seizgan daengz luba? Baenzneix couh ndei lai! Gou ndaej dingj caemz nae lo! Gou buet bae buet dauq gip ngeiqfaex gwnz nae, sawqmwh daxboh hozndat fozfoz buet gvaqdaeuj. Daxboh doiq gou naeuz：“Yawj soujbyauj mwngz geijlai diemj! Guhlawz caengz bae ranz? Daxmeh mwngz naeuz caiq mbouj bae ranz couh ndaq mwngz lo!”Gou guhmuengz yawj le yawj soujbyauj, lij dwg cibngeih diemj lingz caet faen. Gou ndenq soujbyauj hawj daxboh yawj le, naeuz：“Soujbyauj dingj dwg cibngeih diemj lingz caet faen ha!”Daxboh yawj le baez ndeu, naeuz：“Ya！Soujbyauj dwg mbouj dwg vaih gvaq?”Liuxle, gou caeuq daxboh doengzcaez dauqbae ranz lo.

Dauq daengz ranz, gou baez yawj cung- venj, yo? Cung- venj dwg cib- ngeih diemj sam- cibroek faen. Gou hoz ngeix: Haenq lai bw! Caeklaiq dwg soujbyauj“loek”, mboujne gou couh deng ndaq lo.

(Ouhyangz Linzyinz)