Ngoenzneix, gou gwn ngaiz liux le, mbouj miz saeh, couh youq henz bakdou hung naengh dwk gwn bingj. Mbiengj bingj ndeu doek youq gwnz namh, gou mbouj leix de. Mbouj gvaq yaep ndeu, gou yawjraen miz song duz moed iq youq gwnz mbiengj bingj raih bae raih dauq. Gou siengj, song duz moed iq neix daj gizlawz daeuj baenzneix vaiq ne? Gou cingq siengj, fwt raen bang moed iq ndeu raih gvaqdaeuj, gonqlaeng mbouj luenh dwk dawz mbiengj bingj haenx buen haeuj congh bae lo.Yenzlaiz dwg duz moed iq ndeu caeux couh bae ndaw congh ra doih daeuj.

Seizneix, ndaw ukgyaeuj gou miz aen vwndiz ndeu: Duz moeg iq mbouj rox gangjvah, dwg baenzlawz lwnh gyoengq doih daeuj buen gijgwn ne?

Gou gietdingh dawz mbiengj bingj ndeu ndek youq giz wnq bae. Mbouj geij nanz, youh miz duz moed iq ndeu raih gvaqdaeuj lo, menhmenh dwk, duzmoed yied daeuj yied lai lo. Gou sijsaeq baez yawj, yawjraen duzmoed aeu gaeu iq daeuj, mwngz doed gou, gou doed mwngz, baenz lai “vunz”guhhong, boiqhab ndaej ndei lai ha: Gyoengqde nyaengq youh mbouj luenh, couh lumj miz vunz vixyinx ityiengh, gig vaiq couh ndeindei dawz mbiengj bingj buen haeuj ndaw congh bae lo. Gou sikhaek haeujsim cimyawj gaeu iq gwnz gyaeuj duzmoed, hoeng, duzmoed youh dwg baenzlawz yungh gaeu “gangjvah”ne?

Gou siengj haujlai nanz, dauqdaej siengj hwnjdaeuj lo, bingzseiz yawj gvaq bonjsaw《Cib Fanh Aen Vih Gijmaz》, gou rox lo：Duzmoed mbouj rox gangjvah, hoeng, gyoengqde rox aeu doiq gaeu doed bae doed dauq, doxcienz gak cungj saenqsik, neix couhdwg gij vah gyoengqde, gij vah mbouj fatsing gyoengqde, neix couhdwg fouz sing cix beij miz sing ndei, neix caen hawj gou byaengq lwgda, raen seiqmiemh ha!

Gyoengq doengzhag, sou seizneix rox gij laeglemx duzmoed gangjvah luba! Caen mizyinx!

（lauxsae son’gyauq: Cinz Limingz/陈丽明）