Daxmeh, mwngz rox lwi? Youq ndaw sim gou, miz haujlai vah siengj caeuq mwngz gangj. Hoeng, baez raen mwngz le, couh gangj mbouj ok bak, lau mwngz hozndat. Ngoenzneix, mwngz mbouj hozndat ndaej mbouj ndaej, dingq gou gangj liux baenz lwi?

Gij vah neix daj daxbuz youq lajmbanj haenx gangj hwnj. Daxbuz gaenq ndaej roekcib bi lo, gaxgonq gij ndwenngoenz hojnanz haenx youq ndang de ce roengz rizloh bienqvaq gig lai, fouq da hoemz de gumz roengz gvaengzda hung de bae, gyahwnj geij cib bi neix daeuj de cungj miz bingh hohndok in, song diuz ga de byaij gig mbouj lingzbienh lo. Yienghneix, de nanz ciuqgoq swhgeij lo.

Raeuz cungj caj daengz gij ngoenzgyaj nanz ndaej haenx cij dauqbae lajmbanj yawj daxbuz. Daxbuz moix baez raen raeuz dauqma, cungj angq guh mbouj haep bak bae, gipmuengz dawz gij ndeigwn de bingzseiz sij mbouj ndaej gwn haenx daeuj dakdaih raeuz. Yawjraen daxbuz gij ga doengh mbouj fueng- bienh haenx muengz bae muengz dauq, gou cungj roxnyinh ndaeng soemjsoemj nei, raemxda yaek doek roengzdaeuj bae. Daxbuz sinhoj duenh ciuhvunz le, seizneix wnggai daengz seiz ansim yietnaiq lo, hoeng de lij daengx ngoenz yousim! Couh aenvih yienghneix, daxboh gaenq caeuq mwngz daezok aeu coux daxbuz daeuj caeuq raeuz youq, ndei ciuqgoq de bouxgeq. Hoeng mwngz cungj naj ndaemndet nei, doi neix doi haenx. Daxmeh, mwngz rox lwi? Mwngz mbouj wnggai baenzneix doiq dax- buz!

Caiq doeklaeng, hix couhdwg saeh song couh gonq, engqgya hawj gou siengsim. Ngoenzde gou cuengq- hag dauqma, baez haeuj dou, couh roxnyinh mbouj doiq, mwngz caeuq daxboh naj yakyawj dangqmaz, cungj mbouj gangj coenz vah lawz, naenghdai youq gyang ranz. Neix gig noix raen bw! Gou ganjgaenj aeu rox. Yienzlaiz, daxbuz riuj huzraemx ndat seiz deng laemx lo, deng raemxndat sieng daengz lo, soengq bae yihyen gvaq. Daxboh gangj gvaq geij ngoenz aeu coux daxbuz ma ranz, hoeng mwngz youh naj yakyawj lo.

Gou dingq liux, ndaw sim caen mbouj cwxcaih. Daengz seizneix le, daxmeh mwngz lij miz lijyouz dingh mbouj ndaej cawjeiq ma? Dangh- naeuz daxbuz caeuq raeuz youq, de couh mbouj yungh riuj raemxndat, hix mbouj miz gij saeh neix okdaeuj lo, mbouj dwg ma? Daxmeh, gizsaed gienh saeh neix daj hainduj daeuj, mwngz couh mbouj wnggai baenzneix guh!

O! Daxmeh, daxmeh dwggyaez gou, mwngz bingzseiz mbouj dwg gyaez gou dangqmaz, gvansim gou dangqmaz ha? Mwngz vihmaz mbouj caemh gyaez caemh gvansim daxbuz、ciuqgoq daxbuz ne? Mwngz yiemz daxbuz, nanzdauh dwg de dwg boux vunz lajmbanj ndeu? Gizsaed, boux- geq engqgya aeu raeuz bae gvansim caeuq ciuqgoq! Daxmeh, mwngz caen mbouj wnggai baenzneix guh!

Doeklaeng, gou lij siengj lwnh mwngz nyi: Haemh gonq, gou loq raen mwngz、daxboh caeuq gou doengz bae daengz yihyen coux daxbuz ma ranz. Mwngz song fwngz fuz daxbuz, fajnaj daxbuz nyaeuqnyatnyat haenx angq lumj duj vagut angj hai nei……

（Vuz Yinh raiz Veiz Yinyiz hoiz）