De dwg doengzhag gou, hix dwg baengzyoux ndei gou. De heuh guh Lij Vwnz.

Lij Vwnz aen ndang reuxred, byoem henj lumj bwncwz, lwgda ndaemndet, bakminj mbangmbi, henz gaeubak miz aen rei ndeu, gig dwggyaez.

Lij Vwnz gvansim aen ban vunzlai. Yienznaeuz de ranz liz hagdangz gig gyae, hoeng moix ngoenz cungj dwg caeuxcaeux couh daeuj daengz hagdangz baet ranz, baet gyausiz ndaej seuqsetset bae, de lij ciengzseiz daezsingj daihgya daiq ndei hungzlingjginh caeuq yauveih, ndigah ban dou moix cou cungj ndaej mbaw “hoengzgeiz louzdoengh”.

Lij Vwnz sim lingz fwngz giuj, hagdangz dou gawjbanh bangaep vwnzva bingzbeij, de ceiq gaenx, daengx ngoenz sijsij youh vehveh, lij nyinhcaen son dou raed va, raed duzmbaj, daihgya caez doengh fwngz, gig vaiq couh dawz gyausiz cang ndaej gyaeu raixcaix lo.Veiz yaucangj byaij haeuj gyausiz ban dou, yawj daengz gwnz ciengz cang ndaej cingjcingj caezcaez youh gyaeugyaeu ndeindei, naj hai riunyumj, lienzlienz danqhaenh dou guh ndaej ndei, daihgya sim’angq lailai ha!

Lij Vwnz lij dwg boux boihsaw daihvuengz ndaw ban dou, lauxsae iugouz boih gij govwnz, de gig vaiq couh boih ndaej lo. Lauxsae mbouj heuh boih gij govwnz haenx, de hix gag boih. De daiqlingx daihgya doeg govwnz, sing’yaem caen ndeidingq ha!

Lij Vwnz gyaez cizdi, hagsib youh ndei, daihgya cungj gyaez caeuq de guh baengzyoux.

（lauxsae son’gyauq: Cinz Cinhdonz/覃珍团）