Fanhai bonj saw gaeuq seiz, daj ndaw doek mbawfaex henjroz ndeu okdaeuj.

Gou gungj hwet, gip hwnj- daeuj, neix dwg doeg haj nienz- gaep seiz dahdoengzhag soengq hawj gou, youq gwnz sij miz“insik, baengzyoux!”Geiq mbouj ndaej dangseiz dwg mbouj dwg yaek siengj daej lo. Seizneix, baengz- youx gaenq cienjhag bae gizwnq doegsaw lo. Gwnz mbawfaex henjroz caeux couh miz riz raemxda baenz ndik baenz ndik. Youq gwnz seiqgyaiq lij miz cungj simcingz ndeu heuhguh gamj- doengh.

Miz haujlai nanz, gou gaenq lumz bae gij feihdauh gamjdoengh lo, dwg aen sim gou bienq caem lo, roxnaeuz aen sim gou caeux couh deng gij saeh nyapnyuk haenx ciemq rim bae?

Miz baengzyoux sij coenz vah ndeu soengq hawj gou:“Raeuz ngat ndang byaij gvaq, mbouj dwg mbouj miz yienzfaenh, cix dwg aenvih youq ndaw swnghhoz raeuz noix miz gamjdoengh.” Dwg ha, aen sim raeuz caiq mbouj lingz lo, raeuz gaenq mbouj caiq yungh sim bae baez di baez di rom gij gamjdoengh henz ndang. Raeuz veq gvaq de seiz, caiq ngeixdauq gvaqbae, cij fatyienh yenzlaiz raeuz caen dwg saetbae haujlai.

Cungj miz vunz ienq gwnz biengz saeh gamjdoengh gwj daeuj gwj noix. Hoeng, cijaeu raeuz caencingq laemxsim roengzdaeuj siengjsiengj, gizsaed, saeh gamj- goengh dauqcawq miz ya!

Lumjbaenz, doegsaw baeg lo, bohmeh hai aen mak ndeu gaem daengz dangqnaj raeuz, dwg gamj- doengh; hozhawq hojsouh lo, baengzyoux soengq boi raemxraeuj ndeu daeuj hawj mwngz, dwg gamjdoengh; guh loek lo, bouxwnq yienzliengh mwngz, dwg gamj- doengh; doeknaiq seiz, ndaej daengz coenz vah lauxsae raeujrub haeuj rwz, dwg gamjdoengh; haisim seiz, baengzyoux gangj gij vuenyungz hawj mwngz rox, dwg gamjdoengh; bingzciengz, sou ndaej daengz faenh cukhoh iqetet, couhsuenq dwg limq va iq ndeu, mbaw faex ndeu, hix dwg gamj- doengh……

Gamjdoengh, lumj rumzcin ci gvaqdaeuj, raeujrub, gamjsouh rumzcin, ndaw sim raeuz cij bienq ndaej gvangqlangh youh seuqcingh.

Baengzyoux, hawj raeuz dauqngeix gvaqbae gij saeh gamjdoengh geq hix geq mbouj liux haenx ba!

（lauxsae son’gyauq: Cinz Hungzmeiz/覃红梅）