“Liuz Ginjyui, lauxsae cingj mwngz bae funghbanhgoeng de ‘gwn caz’.” Vuz Cijmungz riu dwk doiq gou naeuz, de ngamq daj fungh- banhgoeng lauxsae aeu cozyez dauq- ma. Gou doeksaetyat: “Dai lo.”

Gou gingciengz ngaiz heuh bae funghbanhgoeng lauxsae, cugciemh lau bae “gwn caz” lo. Gwn caz, couh dwg ndwn youq baihnaj cib geij boux lauxsae, ngaem gyaeuj roengz, song ga doxdep, song fwngz cuengq cingq nem sienqvaq, simhaw dingq lauxsae gangjgoj. Rwz gou dwg nding lumj makyungz nei, lij aeu seiz mbouj seiz ngaek gyaeuj hoizwngq, mizseiz lij aeu guhmieng dem, baihlaeng miz cib geij boux dingq dwk ne. Gou gijmaz cungj mbouj lau, couh lau ngaiz gyoengq lauxsae gangjgangj vixvix, caiq gya hwnj coenz ndeu: “Vei, youh daeuj lo, hagseng neix youh guh gijmaz la?” Gou roxnyinh vaihnaj dangqmaz, caenh siengj ndonj haeuj lajnamh bae. Seizneix, baez dingqgangj deng lauxsae heuh bae funghbanhgoeng, gou couh roxdaengz haengjdingh mbouj miz gijmaz saehndei.

Gou swnh lae byaij roengz laj bae, doq byaij doq naemj: “Baezneix youh dwg gijmaz saeh ne? Cozyez caengz sij liux? Gou genjcaz gvaq lobw, mbouj gojnaengz lumz ha. Roxnaeuz dwg lumz mbouj gaijloek? Neix dauq miz gojnaengz, gou gingciengz mad dapanq loek bae danseih lumz le sij dapanq cingqdeng hwnjbae. Roxnaeuz dwg sij ndaej luenh lai? Bae yawjyawj caiq gangj ba. ” Gou itloh naemj bae naemj dauq, ndaw sim hix yied daeuj yied vueng lo.

Youq rog funghbanhgoeng lauxsae, gou gvaengxgvax bae gvaengxgvax dauq, mbouj siengj byaij haeujbae. Doeklaeng, gou laemxsim lo, mou dai mbouj lau raemxgoenj rwed, fanjcingq youh ndoj mbouj ndaej, caeux di haeujbae caeux di liuxsaeh. Gou ndang nem bangxciengz iet gyaeuj daj geh dou caegndomq haeuj ndaw fuengz lauxsae bae, yawjraen gwnz daiz de cuengq miz song bonj cozvwnz, bonj baihgwnz yawj fungmienh couh rox dwg bonj gou lo. Gou sim naemj, dai lo, dwg mbouj dwg cozvwnz sij mbouj doiq daez ha? Yienghhaenx couh ngaiz dauqcungz sij gvaq lo. Seizhaenx gou gaenj- cieng ndaej fajfwngz ok hanh liux, heiq hix supcuengq ndaej yied daeuj yied vaiq.

(Liuz Ginjsui raiz Ouh Caijfangh hoiz)

（caengz sat）