Dauqngeix hwnjdaeuj, gij goj gvendaengz saeh majhung gou ndeiriu raixcaix, hawj gou riu ndaej dungxin bae.

Geiqndaej baez haenx gou lij mbouj caengz hwnj youwzyenz. Seizhah ngoenz ndeu, daxmeh cawx aen gvehoengz hung ndeu ma ranz, gou baez raen aen gvehoengz hung haenx, couh dawz de dangguh aen giuz gvehoengz, lij heuh daxboh daxmeh caeuq gou doengzcaez bek giuz, daxmeh riu dwk naeuz:“Neix dwg gvehoengz, mbouj dwg giuznaeng!”Gou ndatheiq dwk naeuz:“Daxmeh huk, neix couhdwg giuznaeng!” Gangj sat gou couh dawz hwnj gvehoengz yunghrengz gveng hwnj gwnz namh bae, cij dingqnyi“byaz”yiengj sing ndeu, baez yawj, aen gvehoengz deng dekaq baenz song mbiengq, gou vueng lo, naeuz:“Giuznaeng dek lo, giuz- naeng dek lo!”Daxboh daxmeh riu- haha hwnjdaeuj, naeuz:“Neix mbouj dwg giuznaeng ya？Dwg gvehoengz, hahaha!” Gou ngaezngwd lo, caekhaex baez naengh youq gwnz namh, raemxda baenz yaek doek okdaeuj, hujfofo dwk naeuz:“A, neix mbouj dwg giuznaeng, ndatheiq lai lo!”

Haeuj youwzyenz le, gou lijdwg yienghneix, hix gingciengz ok saeh ndeiriu. Miz baez ndeu, lauxsae son raeuz doeg golwgnyez, gou doeg loek haujlai baez, lauxsae mbouj naihfanz dwk naeuz:“Dingq ndei caiq doeg.” Baez neix, gou dingq cingcuj lo, sing hung dwk doeg:“Dingq cingcuj caiq doeg.”Lauxsae baez dingq, baez ngaez le, ciepdwk riuhaha hwnjdaeuj, riu ndaej naj cungj hoengz liux, gou hix dwg baez ngaez, ciepdwk hix dwg riuhaha hwnjdaeuj, riu gaeuq le, lauxsae youh caiq son dou doeg geij baez.

Mboengq majhung haenx lij miz haujlai saeh, gangj hix gangj mbouj sat. Dauqngeix hwnjdaeuj, miz eiqsei lailai ha!

（lauxsae son’gyauq: Vangz Gvei- yangh/黄桂香）