Geij ngoenz neix, seizgan gvaq ndaej caen menh. Gou geq lwgfwngz suenq le youh suenq, lij ca song ngoenz duz meuziq ranz daiq couh rim ndwen lo. Gou caj mbouj ndaej lo, gietdingh ngoenzcog couh bae ranz daiq, coux duz meuziq haenx ma ranz ciengx.

Banhaet, gou caeuq daegbeix daenj buh le, gwn geij amq oemj, gwih ci bae ranz daiq. Daengz le, seizbienh dongx yahdaiq baez ndeu, couh ndonj haeuj ranzyo bae——meuzmeh caeuq meuziq youq gizhaenx ne.

Meuziq ndeigyaez lai lo. Gij bwn de unqnemq ronghsak, bwn henj makdoengj youh gap miz raiz ndaem, gwnz gyaeuj daengj hwnj fouq rwz iq ndeu. Miz lwgda baenzdoiq, aen ndeu lamz, aen ndeu henj, lumj song naed rinbauj ronghsaksak haenx. Aen bak iq de yiengh lumj cih Sawgun “人(vunz)” youq laj ndaeng loq nding haenx, mumh saekcoeng mbehai song baih, yawj hwnjbae ak dangqmaz.

Gou maij lai lo, gungj hwet roengzdaeuj couh umj meuziq. Meuz- meh mbouj hawj lo, coh gou rig heuj, haengx da, hozndat fofo. Daegbeix doiq gou yaepyaep da, song dou couh ndoj haeuj ndaw ranz bae canggyaj yawj densi. Mbouj rox gvaq ndaej geij nanz, meuzmeh cungjsuenq cuengqsoeng lo, de ietiet hwet, okbae lo. Yienghneix dou ganjmuengz ndonjhaeuj ndaw ranzyo bae, umj duz meuziq okdaeuj. Daegbeix umj meuziq ma ranz, gou youq roengzdaeuj buenx daiq. A, cungjsuenq guh baenzsaeh lo, gou angq dangqmaz bae!

Gwn haeuxringz seiz, meuzmeh mbouj raen meuziq lo, couh fatbag heuh hwnjdaeuj. Doq heuh doq buet, doq yungh dasoem de ra bae ra dauq, ra doengh aen rug caez. Meuzmeh gaenj dangqmaz, daengj hoz heuh hwnjdaeuj, mbouj geijlai nanz, hoz de hep lo, gij sing hozhep ndaw de daiq miz siliengz……yawj gij yiengh meuzgeq, gou caen mboujgvaqeiq, vit gaiq noh ndeu hawj de, de mbouj leix, youh buet youh heuh moq, ra lwg de……

Gou baez daih’it gamjsouh daengz doenghduz gyaez lwg swhgeij baenz- neix. Ai, gou loek lo, mbouj wnggai vih gij gyaezmaij swhgeij, ceksanq mehlwg de a! Gou ndawsim ngeix ndei lo, seizbienh gwn geij amq oemj, ganj- muengz ma ranz.

Umj hwnj duz meuziq ndaw ranz, yawj gij yiengh ndeigyaez de, gou miz di sij mbouj ndaej, yienghneix gou aeu gaiq dangauh ndeu gueng de, hoeng de mbouj gwn; hawj cij hawj de, de hix mbouj gwn, cij menhmenh heuh. Gou umj de hwnj, raen de ndang saenzdikdik, doiq lwgda cimyawj gou. De haengjdingh siengj daxmeh de lo, ndawsim gou nyaenx mbouj ndaej saenz baez ndeu, duz meuziq neix doekcaw lai lo! Seizneix, gou lumj youh nyi daengz gij sing meuzmeh heuhyaya haenx, baenzneix gou gietdingh——soengq duz meuziq dauqma henz ndang daxmeh de!

Gou daiq duz meuziq dauq ranz daiq, yaek bae seiz, gou menhmenh rub gij bwn unqnemq duz meuziq, cup aen najbyak gvangqlanglang de, gig nanz sij mbouj ndaej lizhai, cig daengz gou da dumz le……

(Vangz Swjau raiz Veiz Yinyiz hoiz)