Gou haj bi seizhaenx, miz gienh saeh doeksaetyat danhseih mbouj yungyiemj ndeu, daengz seizneix siengj hwnjdaeuj lij miz di ndangsaenz.

Miz ngoenz ndeu, gou cingq naengh youq gwnz sahfaz yawj densi, sawqmwh daxboh daj baihrog dauqma, gwnzmbaq gwed aen siengceij ndeu, ndawde dwg gijmaz doxgaiq ne? Gou gig siengj hai yawj. Daxboh baez cuengq roengz aen siengceij, gou couh sikhaek buet gvaqbae hai yawj. Raen aen doxgaiq luenzlulu lumj aen doengj, lij miz diuz gyongj raez ndeu ne. Seizhaenx gou laihnaeuz dwg duz iugvaiq, couh cam daxboh:“Daxboh, mwngz aemq gijmaz dauq, dwg duz iugvaiq ma?” Daxboh riuhaha hwnjdaeuj gangj:“Neix dwg aen supfoenx.” Gou youh cam daengz daej：“Aen supfoenx youh dwg gijmaz? Miz maz yungh ne?” Daxboh mbouj naihfanz dwk naeuz：“Mwngz gag bae sawq yungh ba!” Gou byaij coh aen supfoenx, cap dienh, diuz gyongj aen supfoenx youh raez youh hung mbouj raen ning, gaendwk gou couh dawz diuz gyongj lumj aen ndaeng duzciengh hung haenx hwnjdaeuj, aeu bak coh ndaw gyongj ci rumz. Mbouj rox dwg baenzlawz fwngz gou naenx deng aen anniuj, “hu” sing ndeu, aen bak gou deng rumz hung sup haeuj ndaw gyongj hung bae. Gou haenqrengz daz ok hix mbouj okdaeuj, gou vueng lo, siengj heuh daxboh daeuj bang gou, hoeng gyongj mbouj ok. Cingq youq seizhaenx, daxboh buet gvaqdaeuj, gou laihnaeuz de caeuq gou beng aen gyongj, mbouj siengj daengz de baez naenx roengz aen anniuj, rumz couh dingz lo, gou daengx ndang unqnemnem dwk naengh youq gwnz namh, gwnz naj haunyo lij conh ok hanh daeuj, lienz heiq mbouj ganj cuengq, ai, hwk yaek dai lo……

Neix couhdwg gij loek dwklau aenvih gou maij ra goekgaen couh deng famh haenx. Seiz- neix baez raen aen supfoenx gou couh lau, caen dwg “baez deng ngwz haeb, laep raen cag cungj lau”ha.

（lauxsae son-

gyauq： Mungz Cwngz-

gen/蒙成建）