De, fajnaj luenzlulu, hoengzfwdfwd, doiq lwgda ndongqliklik, yaepmyebmyeb, baez riu hwnjdaeuj, song mbiengj najgemj couh loh ok song aen cenjlaeuj, dwggyaez raixcaix ha! De hag ndaej ndei, lij gig gyaez bangcoengh bouxwnq.

Sien daeuj gangj de hagsib ndei ba. Hwnjdangz seiz, de daegbied haeujsim dingq goq, gaenx doengh ukgyaeuj siengj vwndiz, youh daihdamj hoizdap, bingzseiz, de cungj mbouj lau cam lauxsae vwndiz. De sij cozyez seiz hix nyinhcaen raixcaix, couhsuenq miz vunz youq henz ndang de guhcaemz, de hix lumj mbouj miz saeh ityiengh, haeujsim lailai. Ndigah, moix baez gaujsi, cingzsik de youq ndaw nienzgaep cungj dwg baiz youq daihsam mingz doxhwnj.

De gyaez bangcoengh bouxwnq. Moix baez gyoengq doengzhag miz gunnanz seiz, de cungj maij coengh, daihgya cungj nyinhnaeuz de lumj dwg boux “fwn gibseiz”.

Baez ndeu, hwnj goq lienh sij saw, gou ra mbouj raen mbaw ceijgek lo, simvueng dwk yaek daej bae. Dang gou gig simvueng dwk mbouj rox baenzlawz guh seiz, dingqnyi singdaemq sug ndeu:“Giz, mbouj daiq mbaw ceijgek ma? Gaej simvueng lo, gou sik mbaw ndeu hawj mwngz ba!” Gou cienq gyaeuj gvaqbae yawj, de cingq coh gou riunyumj, de siujsim dwk daj bonj bouh swhgeij sik mbaw ndeu okdaeuj soengq hawj gou. Mwhhaenx, ndaw sim gou raeujrubrub, sim caem roengz- daeuj lo.

Daihgya cai yawj, de dwg bouxlawz? Sou gyaez cungj baengzyoux neix lwi?

（lauxsae son’gyauq:Cinz Sezginz/覃雪芹）