Bi’gvaq seizcou, makbug gwnz gobug baenz lo, aen’aen cungj henjrwgrwg bae, yinxvunz dangqmaz. Gou caeuq daeggo gietdingh bae baeuh geij aen daeuj gaij bakngah.

Baenzlawz baeuh makbug roengzdaeuj ne? Daeggo gyaeuj baez ngengq, naeuz:“Miz banhfap la.”Cijraen de gip gonj rin ndeu hwnjdaeuj, haenqrengz baez baeuh, gonjrin lumj fagbiu mbin bae. Yienznaeuz mbouj baeuh deng aen makbug, hoeng foengx hwnj bang roeg ndeu. Daeggo hoz lij mbouj nyied, baez ndeu、song baez、sam baez……hoeng aen makbug lij dinghyouq, mbouj ning saek di. Gou caeuq daeggo cungj hoznae lai. Caeklaiq, dou cingq simnae seizhaenx, daxmeh daeuj lo. Cijraen daxmeh ndaw fwngz gaem diuz saux ndeu gyongz doxhwnj, gyongz geij mbat liux, aen makbug ndeu “bwngz” dwk sing ndeu doek roengzdaeuj. Gou caeuq daeggo angqyoekyoek, guhmuengz cung gvaqbae gip aen makbug hwnjdaeuj.

Dauq daengz ranz le, dou doq gwn makbug, doq dingq daxmeh gangj“Vunz ciuhgeq gangj‘yaek guh baenz saeh, aeu hongdawz raeh gonq’, ndigah, baenzlawz genj hongdawz couh gig youqgaenj! Sou gaej hanh cungj fuengfap ndeu ndwi, aeu lai doengh uk, cijndaej ngeix ok aen banhfap ceiq ndei.”

Aen makbug ngoenz haenx lumjnaeuz beij gaxgonq engqgya hom bw!

(Yangz Gyahhih raiz Daegngingh hoiz)