Vunzraeuz ca mbouj lai bouxboux cungj miz aen loqsiengj miz yinxdaeuz ndeu, hoeng aen loqsiengj gou dwg fazmingz cungj gihgi rox caemdingh hozhwnj vaiq dangqmaz ndeu.

Seizneix haujlai vunz beizheiq gaenj yungzheih hozhwnj, gou hix maij hozhwnj. Hoeng gou dwg hozhwnj ndaw dungx, hozhwnj ndaw dungx lij ndei di, cij sieng ndang swhgeij, mbouj yingjyangj bouxwnq. Dangh- naeuz boux hozhwnj mbaet mbouj ndaej, lumj byagiengh- feiz conh’ok nei, hozhwnj coh bouxwnq, cungj vunz neix langh mbouj haenq couh cauxbaenz doxmoeb doxdaj, haenq couh cauhbaenz famhcoih bae lo.

Couh yienghneix, gou siengj fazmingz cungj gihgi ndeu, hawj bouxboux cungj ndaej caemdingh hozhwnj vaiq dangqmaz, bingzbingz dinghdingh caeuq bouxwnq gangjvah, mbouj caiq seiz- bienh hozhwnj. Yienghneix couh doiq haujlai vunz ndei lo, youh ndaej hawj gyoengq bouxcoz lwgnyezrauh caeuq bouxlaux liz aen dou gamlauz gyae’gyae bae, bienq baenz engqgya gvai.

Cungj gihgi neix baenz yiengh seiqfueng, dawz youq ndawfwngz unqnomnom, gveng mbouj vaih lij fuengz raemx fuengz feiz dem. Mwngz hozhwnj seiz, couh yungh fwngz gaem de, de rox gaengawq gij singgwz mwngz caeuq mwngz hozhwnj cingz- doh, boqsoengq souj go ndeu. Cungj go neix unqnomnom, mbaeumbimbi, cingq haeuj ndaw sim mwngz bae, caemh- caiq lij hawj mwngz lumz gij nyapnyuk、gij siengsim haenx bae……

Ceiq leixhaih dwg, cungj gihgi neix rox gaijndei beiz- heiq vunz, moix yungh mbat ndeu, beizheiq couh ndei di ndeu. Danghnaeuz genhciz sawjyungh duenh seizgan ndeu, gojnaengz gvaqlaeng couh mbouj caiq yungh daengz cungj gihgi neix lo, hix mbouj hozhwnj lo.

Gou siengj daengz giz- neix, lienz swhgeij cungj caj mbouj gib siengj sawq baez ndeu. Yienghneix, gou siengj dwk swhgeij cingq yungh cungj gihgi neix: Gou gaem dwk gihgi, caj yaep ndeu le, gihgi hainduj boqcuengq yinhyoz. Cungj wenqngon vuenyungz neix, hawj gou sikhaek lumz gij nyapnyuk bae caez, hix hawj gou soeng roengzdaeuj, lumj dwg youq aen congz unqnomnom haenx gig anyienz ninz ciengz ndeu.

Aen gihgi neix doiq gyoengqvunz miz leih, couh dwg di gungyen gou hawj guekgya ndeu. Danghnaeuz gou majhung le caen rox maeqguh ok cungj gihgi neix, gou couh mienxcienz hawj boux beizheiq yak haenx, hawj vunzlai ndaej vuenyungz, bingzdingh gvaq saedceij, mbouj caiq hawj hozhwnj cungj fangzgvaiq neix ciemq youq ndawsim raeuz.

（Yangz Hauveih raiz Veiz Yinyiz hoiz）