Daihgya ndei, gou dwg aen ronghndwen caeuq daihgya ngoenz- ngoenz raen naj haenx. Daj ciuhgeq daengz ciuhneix, ndawbiengz riuz haujlai gojgaeq sienfangz gyaeundei gvendaengz gou, neix hawj gou bienq baenz boux raen boux gyaez, geizsaed doenghgij gojgaeq riuzcienz neix cungj dwg vunzlai siengjngeix gyaeu- ndei, lajneix gou couh hainduj gangj gij gojgaeq gou lo.

Haujlai haujlai nanz gaxgonq, gou caeuq daxmeh gou——daihdeih, soqlaiz doengzcaez gvaq saedceij angqvau an’onj. Miz ngoenz ndeu, miz boux vunzrwix dwglau ndeu——Buenzgoj okdaeuj lo. De dwg boux vunzhung ndangmaengh dangqnaz, dandan yungh fag fouj ndeu couh dawz gou caeuq daxmeh faenhai, hawj gou deng caeuq daxmeh doxmbek bae. Buenzgoj gvaqseiq gaxgonq, lij nda gyang mbwn ndei, baez daengz banngoenz, gwnz mbwn cungj ok aen giuzfeiz hung ndeu (youq ndaw biengz sou hix heuhguh daengngoenz), seiz- neix gou langh okdaeuj yawj daxmeh, lej ne couh deng aen giuz hung loij sieng, haenq ne couh deng doenghgij feizmbaw aen giuz hung baeu dai bae. Bonjlaiz nyinhnaeuz caj Buenzgoj dai bae le, song mehlwg doxmbek haujlai nanz haenx couh ndaej caiq doxcomz lo, ndaek Buenzgoj dwghaemz neix youh yungh cungj banhfap yakrwix neix daeuj sawj gou caeuq daxmeh doxmbek youq.

Yienghneix gou cijndei ndoj aen giuz hung, banngoenz ndoj youq ndaw fwj, banhaemh bae yawj daxmeh gou. Baez daengz banhaemh, gou couh diemj haujlai aen daengloengz iq rongh hwnjdaeuj, neix ndaej caeuq daxmeh youq gizgyae doxmuengh. Gou rox cimyawj gij daenj cang daxmeh, moix ngoenz miz maz bienq; gou rox cimyawj daxmeh ciengx ganq sou vunzloih, yawj sou daej, yawj sou riu. Banhaemh seizgan dinj lai, baez daengz mbwn ngamqngamq rongh, gou couh sikhaek ndoj hwnjdaeuj.

Couh yienghneix le, ngoenz liux ngoenz dem, bi liux bi dem.

Youq gizneix, gou siengj cingj daihgya coengh gou mbat ndeu, cingj coengh gou ndeindei ciuqgoq daxmeh daihdeih, mbouj hawj de faj naj gyaeundei haenx bienq ndaem bienq mong, gyo’mbaiq gyoengqsou!

(Swng Dingzdingz raiz Daeg- lungz hoiz)