Ngoenzhaenx, gou bae diengzhaex liux le, mbouj rox vihmaz ga caij roengz mieng raemx bae. Ga haizbaengz gou sikhaek deng yomx raemx le mbaeq liux bae, couh bongzbwt naekgywg nei. Dai lo, baenzlawz guh ne? Gou mbouj rox baenzlawz cij ndei, yaek daengz seiz hwnjdangz lo! Mbouj miz maz banhfap, gou cijndaej duet ga haiz dumz ok, dajsuenq gaem de, aeu ga ndeu itloh diuq bae gyausiz gonq.

Gou yat hwnj lae bae. Miz doengzhag raen le, vix gou riuhaha, lij miz geij boux doengzhag goemq ndaeng ndoj gvaq henz ndang gou bae. Gou roxnyinh satnaj dangqmaz, caen siengj ra dieg ndoj youq.

Mwhneix, Vangz Sihyij buet gvaq- daeuj lo. De rex maenh gou, cam: “Mwngz baenzlawz la? Vihmaz diuq dwk byaij loh ha?”

“Gou mbouj siujsim caij roengz mieng raemx bae, deng ga haiz dumz lo.” Gou yaengx ga haiz dumz ndaw fwngz hawj de yawj, lejlej naeuz.

“Yienghneix gou coengh mwngz gaem ga haiz bae gyausiz cuengq gonq, mwngz gaem de mbouj ndei byaij loh.” De gangj vah byotbyat raixcaix.

“Mbouj yungh, mbouj yungh, ga haiz gou youh dumz youh haeu……” Gou vah caengz gangj sat, Vangz Sihyij gaenq daj gyang fwngz gou dued aeu ga haiz haeu bae lo.

“Mbouj youqgaenj, gou swnhbienh bae cam lauxsae aeu baenzlawz guh, mwngz youq gizneix caj gou.”

Gou yawj de diuqbywngbywng bae gyausiz, nyaenx mbouj ndaej raemxda doek lo.

Mbouj geijnanz, de youh buet dauq lo, doiq gou naeuz: “Lauxsae gangj dawz ga haiz bae gwnz cueng dak. Seizneix ngamq dwg dangz daih’it, caj daengz cuengqhag wnggai couh hawq lo.” Gou ngaekgyaeuj gangj ndei, de hix riu- nyumnyum dwk yawj gou. Aen naj riu de caen gyaeundei, caen vandiemz ha! Doeklaeng, de youh itloh rex gou byaij bae gyausiz. Miz de guh buenx, gou roxnyinh mbouj miz gijmaz mbouj ngamj lo.

Mwh cuengqhag, gou daenj ga haiz lij mizdi dumz haenx byaij ma ranz, ndawsim raeujrubrub.

Docih mwngz, Vangz Sihyij! Mwngz rox lwi, gienh saeh neix gvaqbae haujlai nanz lo, hoeng gou cix geiq haeuj ndaw sim laeglaeg bae. Mwngz hawj gou gamjsouh daengz le doxgyaez caeuq raeujrub.

(Cangh Swjau raiz Ouh Caijfangh hoiz)