Gvaq daihhanz le, gouj ngoenz- ngoenz cungj muengh mbwn miz raq nae laux ndeu daeuj. Ngoenz neix banhaet, miz di rongh iq ndeu con gvaq geh baengzcueng daeuj, gou couh caj mbouj ndaej lo, fwt dwk yat roengz mbonq daeuj, daenj ndang- daenj couh buet haeuj lajroq bae. Hw, raq nae laux dangqmaz bae! Gwnz ranz、gwnz ngeiqfaex、gwnz loh cungj doek rim nae haungat nei! Caen lumj coen sei Cinz Sinh:“Lumj naeuz rumzcin haemh fwt daengz, cien fanh goleiz va hai faengh.”

Gou ngamq gwn liux gij cukbazbaujcouh ndatfoed seiz, daxbuz gaenq daj laj laeuz riuj doengj nae rimrej ndeu daeuj. Dou youq ndaw bwnz guh boux vunznae iq gvaqyinx ndeu. Sou yawj, de aen gyaeuj hung hung、lwgda ndaem ndwenndiqndiq、aen ndaeng hoengz soemsijsij、gaiq bakhung gaeuzgengh, gwnz gyaeuj daenj aen mauh soem iq、hoz heux gaenhoz hoengz, yawj le raen dwggyaez dangqmaz.

Banringz gvaq, gou caeuq daxmeh byaij roen bae hagdangz. Byaij youq gwnz roen, naevaiq mbin fwnghfwngh nei, caen lumj doenghgij seifwn baenzdiuz iqiq haenx daenj haeuj vaiqhau liux, fwngz doxbeng youq gyang mbwn guhcaemz guh- angq. Gou youq gwnz giceh vax gaem nae hung ndeu baeuh coq daxmeh. “Bah!” Ndaek nae youq gwnz buhbwnyungz daxmeh sanqhai bae. Daengz hagdangz lo, nae yied doek yied haenq, dou youq ndaw nae menh byaij menh bae. Yw? Giz ndaem va doenghbaez heuswd haenx mbouj raen gvaq, bienqbaenz “ranghdieg nae” haungat lo! Aen cauhcangz bingzbwd gvangqlangh haenx hix mbouj raen lo, bienqbaenz“fan moeg hung”unqnemq soengsup ndeu. Gou guhmuengz lejlej dwk byaij coh cauhcangz, caij haeuj ndaw nae nanoek bae, laj din seiz mbouj seiz yiengj sing“gahcih gahcih”, ce miz baenz coij baenz coij rizdin. Gou youq gwnz cauhcangz haenqrengz buet bae buet dauq、 guhcaemz guh’angq, simmaez raixcaix.

W, neix caen dwg ciengz nae hung hawj gou youh angq youh vuenyungz!

（Gwz Anhsai raiz Daeglungz hoiz）