Cuengqhag le, gou youq ndaw fuengz raiz saw.

Ndaw fuengz caemrwkrwk. Gou naengh youq naj daizsaw, heijdaeuz lienh raiz saw.

Daxmeh cungj naeuz gij saw gou sij haenx yakyawj lai, neix gou couh ndeindei lienhlienh. Ngeix daengz lauxsae naeuz gvaq, sawcih aeu sij ndaej cingq, bit doxvang aeu bingz, bit daengj aeu soh, bit biet na ok aeu soem, gou ciuq saw baez bit baez veh dwk raiz, nyinhcaen sij sawcih aeundaej cingq ndei. Sij le sij le, gou roxnyinh baihnaj lumjnaeuz miz gijmaz, ngiengx gyaeuj hwnjdaeuj, cingq raen duzgyau iq ndeu duengh roengz baihnaj gou daeuj. Gou da cimyawj duzgyau iq, doiq de gangj:“Duzgyau iq ha, mwngz gaej caegyawj gou raiz saw!”Gou gaemh dawz de, coq de roengz gwnz namh bae, laebdaeb sij saw.

Gou sij saw sij lai le couh mbwq lai, okbae aeu cijvaiz gwn, youh guhcaemz yaep ndeu, caiq dauq daengz daizsaw laebdaeb raiz saw, youh raen laj daengdaiz miz duzgyau iq ndeu. Neix caen geizheih dahraix, baenzlawz youh dwg duzgyau iq? Duzgyau iq, dwg mwngz lwi? Mwngz youh daeuj caegyawj gou raiz saw? Lwnh mwngz dingq, caegyawj hix mbouj miz yungh, baedauq mwngz cungj mbouj bae lwnh daxmeh gou!

Duzgyau iq, mwngz gaej caegyawj lai, vaiq di baema! Mwngz hix wnggai guh hongsaeh bonjfaenh lo!

（Yauz Yijli raiz Daegngingh hoiz）