Ngoenzsinghgiz, gou bae ranz- daiq guhcaemz. Yahdaiq geij ngoenz gonq youq gwnzhaw cawx duzmou iq gig ndeigyaez ndeu dauq, gij yiengh de bamzbwtbwt, caen nyex vunz gyaez, cungj hawj gou mbouj ndaej mbouj siengj bae caeuq de ingjsiengq.

Daxmeh bae ndaw reih bang yahdaiq gvak rum, heuh gou banhaet gueng mou iq, gou gig sim’angq ciep aeu aen yinvu neix. Ndaw sim angq lumj gwn dangzrwi nei, diemzswdswd.

Gou gig vaiq couh loengh ndei mokmou lo, dauj haeuj ndaw ruq bae, gig mizyinx ndwn youq henzde yawj de guhlawz gwn mok. Hoeng duzmou iq daengx dwk song da yawj gou, mbouj miz gij eiqsei gwn mok. Gou gip hwnj diuz faexmbaenq ndeu “da da da” bae roq aen ruq mou, hoeng de ning hix mbouj ning.

Neix dwg ok maz saeh ne? Gou gyaetuk gyaetngviz, siengj bae siengj dauq caen mbouj rox vihmaz. Sawq- mwh siengj daengz gou seiz iq seiz daxmeh bwnq gou gwn haeux gij cingzgingj de, “doiq, de mbouj gwn, gou couh bang de.”

Naeuz guh couh guh, gou gaeuz ndang roengzdaeuj, iet song fwngz bae, lejlej byaij gyawj duzmou iq, gou daengx ndang saenzdikdik, naj mbaet ndaej hoengzfwgfwg. Duzmou iq gig dwglau dwk yawj gou, deng lau le doiq dauq laeng bae, itloh doiq daengz henz ciengz bae. “Seizneix yawj mwngz lij deuz gizlawz bae?” Gou bongh gvaqbae, duzmou iq sawqmwh diuq hwnjdaeuj daj lajga gou buet deuz bae lo, gij namh lingzsing haenx, sinz haeuj daengx ndang gou caez, caen boihseiz ha.

Gou mbat neix hozhwnj lo, bik duzmou iq daengz gox ciengz. Mbat neix gou geiqmaenh mbat gyauyin haxbaenh lo, swngzgei de siengj daj lajga gou buet deuz seiz, sikhaek gaemh aeu diuz rieng uqatat haenx, roengzrengz riuj hwnjdaeuj. Duzmou iq caengz deng riuj hwnjdaeuj seiz de couh laemx baez ndeu lo, “vek——vek——vek” dwk heuh hwnjdaeuj.

Gou yungh faexmbaenq nyoengx de daengz henz ruq mou, hawj de bak doiq mokmou, hoeng duzmou iq couh mbouj gwn, lumjbaenz caeuq bouxlawz hozhwnj nei. Gou yungh faexmbaenq moeb gyaeuj de mbat ndeu, de mboujdan mbouj gwn, lij daengx gou dem. Duzmou iq dwg mbouj dwg hozhwnj gou ha? Seizneix, daxmeh cingq dauq daengz lo, gou gig hozhwnj lwnh gij saeh mou mbouj gwn mok neix hawj de nyi. Daxmeh dingq le riuhaha hwnjdaeuj, rub le rub aen- gyaeuj gou.

“Gij maz saeh cungj miz goek- gaen, duzmou iq lau vunzmoq, mwngz bae le de couh gwn lo!”

Dingq le, gou fwt cix singjuk lo. Gou gven dou riengh coq, ndoj youq henz youq, mbouj yaep ndeu couh dingqnyi gij sing “cub cub cub”, ya! De gwn lo! Gwn lo! Gou yawjyawj daxmeh, sim’angq riu hwnjdaeuj lo.

(Fan Gyahyez raiz Veiz Yinyiz hoiz)