Youq ngoenz seizdoeng gou seiq bi seizhaenx, rumzbaek cifefe, fwnnit doeksoebsoeb, rumznit camx ndok, lumj duznyaen rongxhuhu nei, dwglau dangqmaz. Seizhaenx gou youq ndaw ranz yawj saw, daxboh daxmeh okbae cawx byaek lo. Yienznaeuz gou naengh youq henz lozfeiz, hoeng lij gamjdaengz ndangnit. Gou yawj gwnz mbonq le raen duzmui vanzgi haenx, caen siengj umj duzde. Hoeng daxmeh gangj, gou langh umj de, de couh deng uq. Sawqmwh, gou siengjdaengz aen banhfap ndeu: Hawj duzmui daenj ndangdaenj! Gou gag ngeix gag doek- saet bae. Sim ngeix：Doiq ya! Doiq ya! Gou baenzlawz lumz liux lo ne? Duzmui hix lau nit bw!

Gou ganjgaenj vut saw deuz, diuq roengz gwnz daengq daeuj buet daengz baihnaj gvihbuh, hai gvih, aeu song dauq buhvaq “cunghauh” caeuq “daihhauh”, youh dawz duzmui hung rag daengz gwnz sahfaz rogding.

Duzmui hung ndang daiq biz lo, buhvaq“cungghau” yawj hwnjdaeuj ngamjhab. Hoeng baenzlawz daenj cungj daenj mbouj haeujbae, cuengz buh cadi byoengq aen congh ndeu. Cuengz vaq “daihhauh” ngamjhab, hoeng cuengz buh couhdwg iq lai lo, cij daenj roengz di ndeu ndwi. Gou raen “cunghauh” caeuq “daihhauh” cungj mbouj ngamj, gou gig ndatheiq couh dawz lahlen baihlaeng duzmui rag hai, mbon’ok di faiq ndeu, dawz faiq yo haeuj baihlaj ndaw denz bae.Yienghneix cuengz buh “daihhauh” cingq daenj ndaej ngamj, gou gig angq, ndawsim angqvauvau.

Seizneix, daxboh daxmeh cawx byaek ma daengz ranz lo, gou angqvau dwk dawz “cozbinj” hawj gyoengqde yawj. Daxboh daxmeh yawjraen le, haenh gou naeuz:“Gvai lai lo, hix gyaeu dangqmaz!” Seizhaenx, daxmeh dawz soujgih aeu hawj duzmui ingjsiengq, couh raen: Duzmui hung vihmaz naengh mbouj hwnjdaeuj ne? Couh cam gou dwg gijmaz saeh ne? Gou dawz saehcingz daj goek daengz byai lwnh hawj gyoengqde dingq. Daxboh daxmeh dingq le riuhaha hwnjdaeuj. Gou sikhaek naj hoengz hwnjdaeuj, hix mbouj ndei eiqseiq gag riu lo.

Gienh saeh neix gvaqbae roek bi lo, hoeng gou lij geiq youq ndawsim, aenvih ngeix daengz duzmui vanzgi gou ndawsim raeujrubrub, diemz- swdswd nei.

（lauxsae son’gyauq: Vangz Gveiyangh）