Mizdi vunz rox diuqfoux, hawj vunz dwgmaez, mizdi vunz rox ciengqgo, hawj vunz doenghsim, lij miz vunz rox rodnaehang, lumj duzroeg nei youq dieg rodnaehang mbin bae mbin dauq, sim’angq raixcaix. Doenghgij neix gou cungj mbouj rox, hoeng, gou miz yiengh bonjsaeh ndeu, dajcawj ndaej daih’it ——“cawj gij byaek gij ngaiz rangfwdfwd”.

Miz mboengq ndeu, daxboh bae bang vunz dajcaep, daxmeh bae bang vunz raemj oij, bohmeh moix ngoenz cungj dwg laep haeuj laep ok, goq mbouj ndaej gou caeuq daegnuengx, dou song beixnuengx youq ranz cijndaej gwn mienhcimq guh donq, gwn geij ngoenz cungj mbwq lo. Ngoenz ndeu, gou siengj biujyienh swhgeij, cawj donq ngaiz hawj daegnuengx gwn. Daeuj ndaw bakcauq, gou dauqngeix gij yiengh daxmeh dajcawj, sikhaek doenghfwngz hwnjdaeuj. Gou sien dawz haeux coq haeuj ndaw bat swiq seuq bae, lij genj haeuxgok okdaeuj, caiq dawz haeux coq haeuj ndaw denfanbauh, gya raemx mbouj ndaej lai hix mbouj ndaej noix, aeu lwgfwngz rau couh rox raemx hab mbouj hab lo, doeklaeng goeb fa ndei, cap dienh, niuj daengz biugeiq cajngaiz couh ndaej lo.

Cang ndei ngaiz, couh swiq byaek, gou dawz byaekmbungj swiq seuq coq haeuj ndaw swxbyaek, hix dawz makyungz swiq ndei, coq gwnz heng bae ronq baenz gaiq baenz baiq bae. Ciepdwk, gou dub gyaeqgaeq haeuj ndaw vanj bae, dub aen daih’it seiz, gyaeqgaeq gig raeuz, ca di lad ok rog vanj bae lo, gou haeujsim yaengyaeng dwk, seiq aen gyaeqgaeq cungj dub ndei gyaux yinz lo. Gou dawz meizheiq niuj hai, diemjfeiz, yaep ndeu, daejrek yiengj“cicicici”, gou sien coq youz, caiq coq makyungz, cauj yaep ndeu, youh coq di gyu, caiq cauj yaep ndeu，couh dawz gyaeqgaeq dauj haeujbae, youh caiq cauj geij faen cung, dawz makyungz caeuq gyaeqgaeq gyaux yinz bae, yaep ndeu gyaeqgaeq bienq saek lo, gou dawz gyoengqde gvaix haeuj ndaw deb bae, deb makyungz cauj gyaeqgaeq rangfwdfwd couh guhbaenz lo. Daegnuengx yawj ndaej myaiz cungj rih okdaeuj lo. Gou heuh daegnuengx nyaenx dwk, caj gou cawj ndaej byaekmbungj caiq gwn.

Naengh youq henz daiz, daegnuengx sim’angq naeuz:“Daeggo rox dajcawj lo, cawj gij byaek gij ngaiz ndaej caen ndeigwn ha!”

Gou dingq le, ndaw sim diemzsisi, aenvih gou hag rox dajcawj lo.

（lauxsae son’gyauq Cinz Cinhdonz/覃珍团）