Cieng coit, gou romhromh couh hwnqdaeuj lo, angqvauvau daenj gij buhvaq gyaeundei moqsak haenx, baiq daxgoeng、daxbuz、daxboh、daxmeh, lij fat sinsiz、dwk denva hawj caencik baengzyoux baiqnienz.

Baiqnienz sat lo, gou siengj, lij miz bouxlawz mbouj caengz baiq ne?O! Lij miz gyoengq lauxsae raeuz ndiepgyaez haenx. Gou sikhaek bae cam daxmeh aeu soujgih daeuj dwk denva hawj lauxsae. Mwh gou dwk hawj Vangz lauxsae, gou miz di gaenj- cieng youh miz di lau. Gou gaenjcieng mbouj rox gangjvah, lau lauxsae riu gou.

“Duh, duh, duh……”Mbouj yaep ndeu， denva doeng lo. Gou miz di simvueng dwk gangj:“Lauxsae, bi moq ndei. Gou dwg Veiz Yijhangz, cieng coit, gou yiengq mwngz baiqnienz lo!” Lauxsae ndiepgyaez dwk naeuz:“Veiz Yijhangz, Docih mwngz lo, mwngz caen gvai!” Dingq gij vah lauxsae lo, ndaw sim gou diemzsubsub, hix mbouj miz maz lau lo. Gou caiq gangj naeuz:“Lauxsae, hoh mwngz ndangcangq, gunghcoz ndaej swnhleih, naemj maz ndaej maz, yienghyiengh habhoz, ngoenzngoenz angqyangz.” Lauxsae naeuz:“Docih mwngz lo！Hix hoh mwngz ndangcangq, hag maz rox maz! Hoh daengx ranz vunz mwngz ndang- cangq bingzonj vuenyungz!”Gou sim- angq naeuz:“Docih lo! Lauxsae, ngoenzneix gou dajsuenq sij bien ngoenzgeiq ndeu.” Lauxsae naeuz:“Ndei ha, couh sij hohfuk bi moq raeuz ba.”Gou naeuz:“Ndei, lauxsae caiq- raen.”

Ndaep denva le, gou gikdoengh le haujlai nanz. Gou siengj lauxsae bingzseiz yienghhaenx gvansim ciuq- goq raeuz, cawz le youq ciengcoit gou soengq hohfuk ceiq ndei hawj de, lij aeu youq baezlaeng mboujduenh guh lai ndei, aeu neix daeuj gyo’mbaiq lauxsae okrengz youh dwgrengz.

（lauxsae son’gyauq: Mungz Cwngzgen/蒙成建）