Gou doeg siujyoz seiq nienzgaep doxdaeuj, ca mbouj geijlai bibi cungj ndaej bingz baenz hagseng sam ndei, baezneix ndaej bingz baenz “gih” hagseng sam ndei, yienznaeuz dandan dwg lai aen cih ndeu, hoeng de daiq daeuj gij saeh haenx cix hawj gou doeksaet yat.

Ngoenzhaenx cuengqhag daxmeh daeuj hagdangz ciep gou, gou lij siengj ne, de mbouj dwg hwnjban ha? Baenzlawz ndaejhoengq daeuj ciep gou ne? Gou caengz fanjwngq ndaej, couh sawqmwh deng daxmeh umj hwnjdaeuj. “Lwg ha, mwngz caen dwg ak lai lo, gou rox mwngz ndaej senj hwnj lo. Mwngz siengj gwn gijmaz, guh gijmaz, caenhguenj haibak.” Gou geizheih dwk cam de: “Ngoenzneix mwngz mbouj hwnjban ha? Baenzlawz ndaejhoengq ne?” Daxmeh dap: “Gou lwnh bouxdaeuz naeuz lwg gou ndaej bingz hwnj gih hagseng sam ndei lo, de daegdaengq hawj gou cuengqgyaj buenq ngoenz.” Yienghneix hix ndaej cuengqgyaj, caen dwg siengj mbouj daengz. Ciepdwk gou couh naengh hwnj cidienhdoengh daxmeh ma ranz, itloh dingq de gag gangj vah bonjfaenh, hix mbouj rox de gangj gijmaz, lumj duz roeglaej nei cicicaca.

Ngamq byaij haeuj gyang ranz, lij caengz naengh yaep ndeu, couh dingqnyi miz vunz bongx dou lo. Daxboh hix dauqma lo! Mbouj yungh gangj, gou rox, gou ndaej bingz gih hagseng sam ndei, lingjdauj daxboh hix hawj de cuengqgyaj buenq ngoenz. Ciepdwk daxboh youh cup youh umj gou, aenbak haenhndei deih- deih. Mbouj geij nanz……Sou guj ndaej daengz luba? Yahdaiq、goengda、daxgoeng、daxbuz cungj daeuj liux lo. Sikhaek ranz gou bienqbaenz le aen hoihcomz daengx ranz, gou lumj moegyou nei deng gyoengqde humx youq cungqgyang. Daengx ranz vunz lumj cawx caijbiuq ndaejciengj ityiengh haisim. Vunzhung caen dwg gyaj, haemh gonq lij naeuz bingz mbouj bingz ndaej hwnj mbouj youqgaenj, cijaeu gou caenhrengz bae guh couh baenz lo. Mwngz yawj, gizsaed doiq gyoengqde daeuj gangj youqgaenj dangqmaz!

Couh yienghneix, gou hix yungz haeuj cungj haisim neix bae, aenvih gou mbouj siengj hawj gyoengqde saetmuengh. Hoeng gou rox baelaeng aplig gou haengjdingh engqgya naek lo. Aenvih ndaej bingz baenz gih hagseng sam ndei le, daxmeh haengj- dingh doiq gou iugouz engqgya sang, siengj daengz neix, gou hix cijndaej danq gaemz heiq laeglaeg ndeu……

（Vangz Yijhwngz raiz Ouh Caijfangh hoiz）