（ciep geizgonq）

Lienh sam seiq ngoenz liuxle, boux gaenx hag gaenx doeg rox ndaej gig vaiq, boux siengj hag youh mbouj siengj doeg haenx couh “w w a a” doeg mbouj ndaej baenz yaem. Yaek son dungcoz seiz youh yom bae song boux hagseng. Sam haj ngoenz dingj hag roengzbae, mbangj boux rox doeg hix rox geiq ndaej sawloih lo. Neix couh ndaej son gij dungcoz hwnjbae lo. Dou caeuq hagseng baizlienh itmienh geiq sawloih itmienh hag dungcoz. Nanzdoh yied daeuj yied hung lo, neix dwg gaujniemh gij ceiqheiq gyoengq hagseng lo. Miz vah gangjnaeuz: Siengj guh ndei gvaq vunz, aeu gwn haemz lai haemz. Dou itcig bang hagseng ra fuengfap daeuj geiq gij sawloih Sawcuengh, cix itcig nai gyoengqde aeu insik aen gihvei ndei biujyienh ok swhgeij, haengjheiq hawj gyoengqde gaej doeknaiq, gaej simnaiq. Gou mienh vued sim hagseng, hix dwg vued aen sim unqnemnem gou. Miz gyoengq lingjdauj gvensim caeuq vixyinx, aen cietmoeg dou couh yaek baenz lo. Dah cujyau yenjyenz baenzbingh lo, aen hoz de deng siengvaih lo, canghyw naeuz de mbouj ndaej caiq daeuj baizlienh lo, dou deng bik ndaej dauqcungz bae senj dah doeg ndaej youh ciengq ndaej daeuj baizlienh. Vunzlai simgip lo! Heuh gou caiq daj it son daeuj, gou hix nyienh bae rap haexmou rwed byaek suenq lo. Hoeng cijaeu mwngz siengj guh, goengmbwn couh hawj lingh diuz loh hawj mwngz byaij. Couh youq gou simgip ra vunz daeuj baizlienh seiz, miz lauxsae hawj gou aen cawjeiq he: Ra dah ndeu rox diuqfoux daeuj itdingh hag ndaej vaiq. Yienghneix gou daj sam nienzgaep ra dah iqet he hag le seiqhaj bi diuqfoux daeuj ndeindei son de fatyaem doeg Sawcuengh, ngamq hag ndaej buenq ngoenz, de couh dawz gij vah de youq gwnz heiqdaiz gangj haenx doeg ndaej cingcuj lo. Neix caen hawj vunz simhai a, aen sim gou dauqdaej ndaej cuengq roengzdaeuj lo. Dah neix caen dwg dug fiengz gouz vunz hwnj gwnz hamq haenx ha. De rox doeg rox ciengq, sing seuq youh maezvunz. Vih hawj gyoengq yenjyenz geiq sawloih lai ndei di, moix baez baizlienh gou cungj dawz gij saw caeuq gyoengqde daj goek daengz byai doeg le baez dem baez. Aen sim gou bonjlaiz siengj mbouj guh haenx hix mbouj gamj miz saek di siengjfap lo.

Guh gijmaz cungj aeu ndei le caiq aeu lai ndei dem, ndigah dou moix ngoenz cungj dwg lienh le caiq lienh, aeu lienh ndaej sugsed bae. Moix ngoenz gyoengq lauxsae cungj yawjraen dou youq gwnz cauhcangz、naj dou fandangz、youq ndaw veiyisiz、 youq laj goek gofaex……gizgiz cungj yawjraen gij ngaeuz dou nyinhcaen baizlienh haenx.

Dou hix rox：Mwngz giengz gou hix ak, youq aen daizheiq swcigih dungxcaiz doxdax, dou mbouj dwg aen doih biujyienj ndaej ceiq ndei, hoeng dou gag nyinhrox dou itdingh dwg aen doih ceiq roengzrengz haenx. Aenvih dou saenq: Mbwn nit vamoiz hom, gaenx muz giemq couh raeh. Cijaeu dou gaenx hag gaenx lienh, dou itdingih guh ndaej engq ndei! Baez neix dou mbouj hawj daihgya saetmuengh, aeundaej ngeihdaengjciengj dauqma, baezlaeng dou vanzlij aeu caiq roengzrengz, dawz gij hong guh ndaej engq ndei!

（sat）