Geij ngoenz gonq, gou caeuq daxgoeng daxbuz doengzcaez bae gunghyenz gaeb saehaexma. Gou gaeb ndaej duz saehaexma haenx dwg byuk saekcoeng ndawde youh daiq di saekhau, yiengh lumj duzsae, lumj aen ranz iq nei. Gwnzgyaeuj duz saehaexma miz doiq “denhsen(gaeu)” iq saeq ndeu, neix couhdwg mumhgok de, gij “cawndaem” gwnz mumhgok couhdwg lwgda, ndaemndindi, luenlulu. Duz saehaexma suk ndang haeuj ndaw byuk bae seiz, gou roxnyinh de lumj aen sae ndeu.

Dingqnyi naeuz duz saehaexma youq gwnz biengz gyoengq doenghduz ndawde dwg duz miz heuj ceiq lai haenx, saehaexma gungh miz song fanh haj cien roek bak swnj heuj. Gij heuj de maj youq gwnz linx, ndigah heuh de guh heujlinx.

Gou aeu mbawbyaek singjsien ndeu, coq youq henz duz saehaexma, yawjyawj de guhlawz gwn. Duz saehaexma raen mbawbyaek le, couh heij gwn lo. Duz saehaexma aeu mumhgok de red le red mbawbyaek, couh amq hunghung nei gwn hwnjdaeuj lo. Cij gvaq yaek ndeu, duz saehaexma couh youq gwnz mbawbyaek gwn baenz aen congh ndeu daeuj.

Moix ngoenz gou ndaejhoengq couh bae yawj- yawj duz saehaexma gou ciengx neix. Hoeng, ngoenzneix gou bae cazyawj seiz, raen duz saehaexma loq doengh loq mbouj doengh nei suk youq ndaw byuk. Yienghneix, gou coq di raemx haeuj ndaw hab gou ciengx duz saehaexma neix bae, gvaq yaep ndeu, duz saehaexma cungjsuenq ndiu lo.

Gou lij raen, duz saehaexma moix baez bin gvaq gizlawz gizde cungj ce miz diuz riz hau ndeu. Seizneix, gou raen duz saehaexma cingq youq henz bingz bin doxhwnj, duz saehaexma mbouj miz din vihmaz de rox byaij ne? Yienghneix, gou bae cam Duniengz. Yienzlaiz duz saehaexma aiqnaeuz mbouj miz doenghduz wnq cungj din iet gungj cwxcaih haenx, hoeng youq najdungx maj miz cungj dinnoh rox doengh ndeu, heuhguh dindungx.

Duz saehaexma dwg cungj doenghduz miz yinxdaeuz ndeu, gyoengqde mboujdan hawj gou daiq daeuj haujlai yinxdaeuz, caemhcaiq hawj gou rox le haujlai cihsiz.

（ Vangz Vanghyangz raiz Veiz Yinyiz hoiz）