Gou miz song daeggo, daxmeh ceiq gyaez gou, moix ngoenz cungj bang gou cang ndang ndaej lengjsusu bae. Ndaw ranz, gou miz vunj moq gak saek gak yiengh, haiz moq baenz baiz baenz baiz, git byoemgyaeuj baenz gyang do. Daxmeh doengx- ngoenz bang gou bwz song diuz saibienx, daiq song duj git mbungqmbaj, couh lumj duzmbaj ityiengh mbin bae mbin dauq, geijlai sim’angq ha!

Gou dwg dahgunghcuj ndaw ranz, ngoenznaengz buh daeuj iet fwngz, ngaiz daeuj aj bak, miz gij ndeigwn seiz song boux daeggo cungj sien hawj gou gwn. Gou ndaej 9 bi lo, lienz byoemgyaeuj lij mbouj rox roi, gyoengq doengzhag riu gou, gou cix mbouj dawz haeuj rwz.

Youq ngoenz singhgizroek ndeu, daxmeh haetcaeux bae bang vunz raemj oij, gou hwnj congz baez ciuq aen gingq, a, byoemgyaeuj nyungq- nyatnyat, geijlai yakyawj ha. Daxmeh mbouj youq ranz, gou baenzlawz okdou bae guhcaemz ya? Gou sim siengj：Gou gag hag bwz byoem ba. Siengj dwk, gou couh gaem fag roi daeuj, youh ra di git caeuq di gaugu daeuj, hag gij yiengh daxmeh, sien dawz byoemgyaeuj roi doeng, caiq bwz song diuz saibienx, gou fwngz gaem fag roi, gwnz bak gag nam:“Bwz gij saibienx miz gijmaz nanz ne!”Hoeng gou bwz bae baenz buenq ngoenz, gen fwngz cungj naet lo, cij bwz ndei song diuz saibienx. Gou sijsaeq ciuq aen gingq yawj, mbwn ha, bouxvunz ndaw gingq couh lumj boux yahboemx iq ityiengh, yakyawj raixcaix. Saibienx mbiengj hung mbiengj iq, caemhcaiq miz geij nyaep byoem lij mbouj bwz haeujbae, gou miz di doeknaiq lo. Hoeng youh siengj daengz daxmeh ngoenzngoenz bae guhhong lij hawj gou roi gyaeuj, daiq sinhoj lo. Gou maj hung lo, gij saeh swhgeij wnggai swhgeij guh, siengj dwk, gou youh miz saenqsim lo. Baezneix gou sijsaeq roi, mboujduenh dauqngeix gij yiengh daxmeh roi gyaeuj. Bwz ndei lo, youh bae ciuq gingq seiz, ndaw gingq song diuz saibienx yawj hwnjbae ca mbouj geijlai ityiengh hung, byoem hix cungj bwz haeujbae lo, hoeng henz dujrwz youh roi mbouj bingz. Gou youh nyinhcaen caiq roi baez ndeu. Daihsam baez yienznaeuz yungh seizgan engq lai, hoeng bwz ndaej song diuz saibienx cungjsuenq yawj ndaej gvaq da lo.

Gou geb song fag git mbuengq- mbaj hwnjbae, doiq dahsau ndaw gingq angq dwk diuqfoux hwnjdaeuj, song diuz saibienx hwnjhwnj roengz- roengz, lumjbaenz hix gaen dwk diuqfoux ne! Gou caen sim’angq ha! “Gou hag rox bwz byoemgyaeuj lo.”Gou dauqcawq buet, hai sing hung hemq.

（lauxsae son’gyauq Cinz Cinh- donz/覃珍团）