Daxmeh gou bineix 38 bi lo, hen byoemgyaeuj raez- langlang, doiq lwgda ndeu ronghrikrik. Daxmeh gou vah gig lai, gawq vah ndeu gangj bae raemh dauq, gou dingq ndaej dujrwz cungj hwnj dae lo. Hoeng, daxmeh gig gyaez gou.

Miz baez ndeu, gou cingq yaek bae yozyau, daxmeh unq- swnh naeuz：“Lwgbauj, doek- fwn lo, mwngz aeu gaem liengj bae bw.”Gou yawjyawj, raen cij doek miz geij naed fwn, gou gik gaem liengj, couh gangj:“Geij naed fwn’iq neix, lau gijmaz!”Daxmeh youh naihsim naeuz：“Danghnaeuz doek fwnhung ne? Vaqbuh mbouj dumz ha?”Gou mbouj dawz haeujrwz, gangj：“Gizlawz miz fwnhung, Mwngz hemq de doek de cungj mbouj doek bw!” “Lauheiq doek fwnhung ne?” Daxmeh youh hozraez dwk gangj. Gou dingq le, hozndat dwk dap：“Haenx dwg aen saeh lauheiq, daj gizlawz ndaej daeuj baenzlai lauheiq! Vah mwngz caen lai ha!” Daxmeh dingq le najcingq dwk naeuz:“Mbouj ndaej! Mbouj lauheiq hix aeu daiq liengj bae! Ndei gvaq deng fwn rwed.”Gou mbouj caiq guhsing, huj- dengdeng dwk gaem aen liengjiq couh okdou lo.”

“Gaem liengjhung ha!Liengjiq cij ndaej dangj ndit caeuq dangj fwn iq!”Daxmeh youq baihlaeng rangz sing- hung. Ngw! Caen lohsoh! Gou gyajcang dingq mbouj nyi, buet bae yozyau lo.

Youq gyang loh, fwn yied doek yied hung, lumj bat dauj raemx daj mbwn dauj roengzdaeuj. Mbouj ndei lo, doiqhaiz、dinvaq deng rwed dumz lo. Gou dawz liengjiq ngeng baihnaj bae, baihlaeng aen daehsaw youh deng fwn rwed. Gou youh dawz liengj iq ngeng baihlaeng bae, doiqhaiz、dinvaq youh deng fwn rwed. Gou gietdingh baujhoh daeh- saw, mbouj hawj daehsaw rwed fwn.

Byaij daengz yozyau, doiqhaiz caeuq gavaq gou cungj dumzsoemsoem lo. Ai! Danghnaeuz dingq vah daxmeh couh ndei lo.

Mbouj geij nanz, daxmeh byaij haeuj gyausiz yawjraen gou, naeuz：“Hemq mwngz gaem liengjhung, mwngz youh mbouj dingq, ndang dumz sat caengz? Mbouj dingq vah bouxlaux, gwnvi youq dangq- naj!”Gangjsat, daxmeh dawz aen daeh hawj gou, lwnh gou bae vuenh haiz、vuenh buhvaq.

Cuengqhag ma daengz ranz, daxmeh cawj vanj raemx- hing hawj gou ndoet, youh cienq raemxhing hawj gou cimqdin.“Neix dwg re dwgliengz!” Dax- meh youh nambetbet lo.

Seizneix, gou cij rox daxmeh lohsoh dwg vih gou ndei ha! Daxmeh, gou gyaez mwngz. Baezlaeng, gij vah mwngz gou aeu geiq haeuj sim bae, mbouj caiq hawj mwngz yousim gou.

(lauxsae son’gyauq Cinz

Caijfwnh/覃彩芬)