Ngoenzneix dwg ngoenz daihsam guh hoh gyaeq hengzdoengh.

“Vangz Sizyij, mwngz ak dahraix!” Seiz roengz- dangz yietnaiq haenx, gou dingqnyi Vangz Yozhanz haenh Vangz Sizyij ne. Gou siengj: De itdingh dwg naeuz gij “doenghyiengh dajcang” Vangz Sizyij ak dangqmaz ba. Mbouj yawj mbouj rox, baez yawj, lij caen doeksaet hwnjdaeuj bw! Vangz Sizyij youq gwnz gyaeq suek le song caengz daeh baujsien! Fug lo, fug lo! Daengz seizneix——ngoenz daihsam banhaet, gij gyaeq de lij ndei mbouj deng vaih. Gou youh yawjyawj Siujguhdungh, de hix ndei dangqmaz ne. Gij gyaeq gou hix suek le haujlai caengz, doengzyiengh dwg “cungj fuengzre”, daengz seizneix hix mbouj vaih, ndaw sim gou hix diemzswdswd.

Hoeng gij saeh boihseiz haenx okdaeuj lo：Hwnj dangz yijvwnz seiz, lauxsae cingq bingzgangj sigenj. Boux doengzdaiz gou Cinz Mingzyij miz diuz daez ndeu mbouj rox, siengj yawjyawj gij dazan deng gou, mbouj siujsim bungq aen daiz gou baez ndeu. Aen Guhdungh couh youq gwnz daiz diuq hwnj “foux baenqcienq”, yawj de couh yaek doek roengzbae lo. Hoeng couh dwg seizneix, aen hab vwnzgi gou hix yaek doek lo. Gou baez muengz, muengz lai ok luenh lo, lienzmuengz rex aen hab vwnzgi baez ndeu, gingqyienz lumz Guhdungh bae……de “vutmingh”lo, ai……

Yawjyawj gyoengq “mingzsingh hoh gyaeq”, gou hozhaenz youh najmong. Gyoengqde cingq dwg aeu naihsim caeuq saeqsim cij guh baenz ne. Danghnaeuz gou caiq saeqsim saek di dem, yienghneix “boux mingzsingh hoh gyaeq” hab’ingj ndaw de itdingh hix noix mbouj ndaej gou ha!

（Vuz Yizsangh / sij Veiz Yinyiz / hoiz）