Duenh gonq, gaiq daihsam daengx gih Vahcuengh biucinj dungx- caiz doxdax youq Namzningz guhsat lo, aen cietmoeg 《Hwnjdin》 hagdangz dou ndaej aen mingzdaeuz ndei he——ngeihdaengjciengj, boux cujciz ngamq senhbu gezgoj, gou gikdoengh ndaej raemxda cungj yaek roenx okdaeuj. Baez dungxcaiz doxdax neix, gij ginggvaq caepcawq de dwg dwgrengz dangqmaz, hoeng dou cungj cug mbaek cug mbaek yamq gvaqdaeuj lo. Ngeuxgyaeuj dauq ngeixngeix baez ginggvaq caepcawq faenh hong neix, gij fubfab ndaw sim gou lij hwnjhwnj roengzroengz dem.

Ndwen gonq ndwendaej, ndaw si gyauyuzgiz fat dunghcih daeuj hagdangz dou heuh dou caepcawq cietmoeg bae camgya gaiq daihsam daengx gih Vahcuengh biucinj dungxcaiz doxdax. Ciep ndaej dunghcih, lingjdauj hagdangz couh siengj daengz heuh gou （Aenvih hagdangz dou cij miz gou bae hagdangz Sawcuengh hag gvaq Vahcuengh biucinj） bae ca aen cietmoeg okdaeuj bae camgya. Hoeng neix cingq youq duenh gou guh gij hong caepcawq swcigih 60 hopbi caeuq gij hong roengz mbanj fuzbinz nyaengq ndaej laep mbwn laep deih. Hoeng vih haeujcoengh gij hong baihgwnz, ndaw sim hix saenq: Ruz daengz gyaeuj giuz rox gag soh, cijaeu gou vid genbuh hwnjdaeuj guh, itdingh guh ndaej okdaeuj. Yienghneix gou comz doenghboux doengzsaeh miz dungxcaiz ak haenx gyaban raiz ok faenzcieng guh sawheiq, aeu baiz aen siujbinj ndeu bae camgya.

Sawheiq dingh ndei le, gij hong cieplaeng couh dwg senj ok gak boux yenjyenz daeuj baizlienh. Aeu baizlienh ok cietmoeg couh aeu bae senj ndei vunz. Senj vunz gig mbouj yungzheih, gonqlaeng gungh senj le sam bang vunz. Aenvih hagdangz dou dwg youq ndaw singz, gyoengq hagseng daj iq henz ndang couh humx miz gyoengq vunz gangj Vahgun, gig noix miz vunz gangj Vahcuengh, gyoengqde couh noix miz vunz rox gangj Vahcuengh. Bang daih’it dwg senj doenghboux nyienh hag Sawcuengh haenx. Daj baihndaw gyoengqde sien senj ok boux fatyaem loq ndei di okdaeuj sawq yaem sawq doeg. Ginggvaq sawqyaem, senj aeu doenghboux fatyaem cingcuj mbei hung youh nyienh hag haenx. Gij hagseng louz roengzdaeuj haenx cungj dwg baez daih’it raen Sawcuengh, ndaw sim roxnyinh gig mizyinx, gig gyaez hag haengj hag. Ngoenz daihngeih daeuj hag seiz, miz vunz couh miz di mbouj haengj hag lo, aenvih gyoengqde mbouj rox gangj Vahcuengh, gyoengqde nyinhnaeuz Sawcuengh caen mbouj yungzheih fatyaem, daegbied dwg gij sawloih hamz miz lai cih singmeh youq ndaw, couh gig hoj fatyaem. Gou son le baez dem baez, miz mbangj boux couh dwg mbouj rox fatyaem, lienh bae lienh dauq, doengh boux gag rox hojnanz couh suk dauqbae mbouj nyienh baizlienh lo. Miz mbangj dwg bae ranz doeg hawj bouxlaux dingq le, bouxlaux nyinhnaeuz hag aen cietmoeg Sawcuengh neix nguh gij hagsib swhgeij, hix doiq okbae mbouj lienh lo. Doeklaeng lw miz bet boux roengzdaeuj lienzdaemh hag. Hoeng aenvih gyoengqde mbouj miz saek di giekdaej Sawcuengh, baihlaeng geiq sawloih hix dwgrengz raixcaix. Mboujguenj baenzlawz yiengh, gou hix cungj dwg naihsim naihhoz bae son gyoengqde. Baez aen baez aen sawloih menhmenh son, youh baez boux baez boux ndeindei son aeu rox doeg, caenhliengh son gyoengqde ndeindei hag dingq hag doeg. Miz saek aen sawloih gou son le cib baez ngeihcib baez cungj miz, hoeng gyoengqde cungj mbouj doeg ndaej baenz yaem biucinj, mizseiz sim gou hix cungj naiqnetnet bae ne. Lumj dwg cih “mbwn”, gou menhmenh son doeg: mb——wn——mbwn, mb——wn——mbwn, danhseih gyoengqde cungj dwg doeg baenz “bwn” okdaeuj, son ndaej gou simgip simnyap bae. Faenh sawheiq neix gungh miz bet bak lai aen sawloih, gou son gyoengq bouxyienj doeg hix aeu doeg hwnj fanh sam fanh seiq baez, son ndaej gou bak rauj hoz hawq yaek ok hoenz bae.

（caengz sat）