Gou youq ndaw ndoengfaex, miz aen ranz vuenyungz gyaeundei ndeu. Gizde faex maj ndaej mwnswdswd, raemxdah sawdikdik, gwnzmbwn lamzliklik，hoengheiq singjsien dangqmaz. Gou youq ndaw ndoengfaex mbin bae mbin dauq, cwxcaih lai lo. Dauq daengz ndaw ranz, miz bohmeh gyaezmaij, caeuq daegbeix dahcej、daegnuengx dahnuengx doengz guhcaemz, saedceij mbouj youheiq, ndei dangqmaz bae.

Hoeng gij ndei neix mbouj nanz, mbouj gvaq geij ngoenz ndaw ndoengfaex daeuj le haujlai boux canghdwknyaen, daxboh boihseiz lai deng cungq nyingz, liz dou bae lo, gou caeuq daxmeh siengsim lai daej hwnjdaeuj. Hoeng mbouj gvaq geij ngoenz, daxmeh youh deng hoenz roemz dai bae, gou caeuq daegbeix dahcej、daegnuengx dahnuengx doxbaengh gvaq ngoenz. Gvaq le geij ndwen, daegbeix dahcej hix mbouj raen lo, aen ranz vuenyungz haenx cij lix gou caeuq gyoengq daegnuengx dahnuengx. Doeklaeng, daxlungz roeggacak naeuz gou nyi: Daxboh mwngz dwg deng lwgyienz couh liz sou bae lo; daxmeh mwngz dwg aenvih baihhenz guh aen vagunghcangj le, de deng gij hoenz ndawde roemz dai bae lo; daegbeix dahcej mwngz dwg deng gij lwgnyez maij guhcaemz haenx yungh muengx gaemh bae lo, caemhcaiq gven youq ndaw loengz. Dingq le gij vah daxlungz roeggacak, gou rox gyoengqde caiq hix dauq mbouj ndaej lo. Mbouj miz maz fap, gou cijndaej vih daegnuengx dahnuengx ra gijgwn. Sawqmwh, gou raen duznon hung ndeu, gou gietdingh gaeb de dauq bae, hawj gyoengq daegnuengx dahnuengx gwn donq imq ndeu. Couh youq gou yaek bae gaeb seizhaenx, lwgnyez maij guhcaemz haenx yungh muengx gaeb gou bae lo. Gou deng gven youq ndaw raep, gou yawjraen gyoengq nuengx gou daejngaungau. Gou cij rox hemqheuh gyoengqvunz sikhaek guh hwnjdaeuj, gouq dou baujhoh dou, hawj dou miz aenranz gyaeundei ciengxlwenx ndeu.

Gyoengq bouxdoih ndeigyaez, cingj sou doengzcaez baujhoh dou, dou rox bang sou gaeb nonhaih, hawj gij miuzhaeux sou maj ndaej ndeindei bae.（Yi Cozyenz sij Veiz Yinyiz hoiz）