Mbangjseiz gou youh gag naeuz: “Mbouj lau go! Lwgvuengziq haemh- haemh cungj coq duj va de haeuj ndaw habgingq bae, de lij hendawz duzyiengz dem……” Ngeix daengz gijneix, gou couh angqfaengz lai, ndaundeiq cungj riunyumnyum liux.

Mbangjseiz gou youh gag naeuz: “Vunz raeuz mbangjbaez fuengzre mbouj daengz, yienghneix couh dai lo. Saek haemh de lumz coq duj va haeuj ndaw habgingq bae le, roxnaeuz duzyiengz caegcaeg deuz okdaeuj le……” Yienghneix aenlingz couh bienqbaenz raemxda lo.

Doiq gou daeuj gangj, doiq gyoengq boux sou gyaez Lwgvuengziq neix daeuj gangj, langhnaeuz youq saek giz, raeuz cungj mbouj rox dwg gizlawz, miz duzyiengz (raeuz mbouj roxnaj) ndeu, gwn le——roxnaeuz caengz gwn duj vameizgveiq ndeu, yienghneix, gwnzmbwn lajmbwn cungj bienq liux- caez.

Gyoengqsou ngiengx gyaeuj yawj gwnzmbwn. Gag cam ndanggaeuq: Duzyiengz ndaej gwn le roxnaeuz caengz ndaej gwn duj va ne? Yienghneix sou couh rox sojmiz cungj bienqvaq lo.

Hoeng, gyoenqq bouxlaux cungj mbouj rox vihmaz aen saeh neix youqgaenj baenzneix!

Doiq gou daeuj gangj, neix dwg gingjsaek ceiq gyaeundei, caemh dwg gingjsaek ceiq dungxliengz. Lumj bonj sawveh ndeu, mbaw veh neix caeuq mbaw gaxgonq de gingjsaek doxlumj. Gou veh de okdaeuj baezmoq, hawj gyoengqsou geiq haeuj uk bae lai maenh di. Couhdwg youq gizneix, Lwgvuengziq doek daeuj gwnz Deih- giuz, caemh dwg youq gizneix, Lwgvuengziq mbouj raen bae.

Langhnaeuz miz saek ngoenz gyoengqsou bae Feicou youz, bae daengz diegsa, cingj gyoengqsou sijsaeq dwk nyinh gij gingjsaek neix, mboujne couh deng loenggvaq. Langhnaeuz gyoengqsou byaij gvaq gizde, gaej byaij rouz lai, ndwn youq baihlaj aen ndaundeiq neix caj yaep ndeu. Langhnaeuz miz boux lwgnyez ndeu byaij daengz baihnaj gyoengqsou, riunyumnyum, byoemgyaeuj henjrwk- rwk, gyoengqsou cam de gijmaz de cungj mbouj ngah han nauq, gyoengqsou couh rox de dwg bouxlawz lo. Daengz seizde, gyocingj gyoengqsou! Gaej dungxliengz lai, raiz saenq daeuj lwnh gou nyi: De dauqdaeuj lunw……

（43）