Daxmeh gou gig gyaez gou! Vihliux hawj gou vuenyungz majhung, de bingzciengz sinhoj bae guhhong. Gou sim’angq seiz, de hix sim’angq, gou ndangnaiq seiz, de simgip raixcaix.

Miz baez ndeu, gou caeuq geij boux doengzdoih daengz bak mbanj bae youz, dou doxdax benz faex, yawj bouxlawz benz ndaej ceiq sang. Dou benz hwnj gorenh hung ndeu, gou benz ndaej ceiq sang, sim’angq raixcaix. Mbouj yaep ndeu, gou yawjraen daxmeh bae guhhong dauqma, couh vad fwngz hai singhung hemq: “Daxmeh, gou youq gizneix, mwngz yawj ndaej raen gou lwi?”Daxmeh ngiengx gyaeuj yawjraen gou seiz, gou riuhehe, lij doiq de guh aen najgvaiq ndeu. Sawqmwh, aen ndang gou baez bibuengq, couh doek roengz namh lo. Hainduj, gou cij gamjdaengz gyaeuj ngunh daraiz, caekhaex mazmwdmwd, mbouj yaep ndeu couh mbouj rox gijmaz lo. Caj gou singj gvaqdaeuj seiz, fatyienh swhgeij ninz youq ndaw yihyen lo, gwnz gyaeuj nem miz baengzsa hau, daxmeh naengh youq henz congz simgip dwk gag nambedbed. Raen gou singj le, daxmeh sim’in dwk cam:“Dahlwg ha, gyaeuj mwngz byoengq lo, ok haujlai lwed, lij in lai lwi? Daxmeh yousim lai lo.”Gou riu naeuz:“Mbouj in lo, raeuz baema ranz ba!”

Dauqma daengz ranz, daxmeh cam gou:“Dahlwg, dungx iek loba, mwngz naengh youq ndaw rogding yawj densi, siengj gwn gijmaz couh gangj, daxmeh bae loengh hawj mwngz gwn.”Gou gangj gwn makyungz cauj ndoksejnoh. Daxmeh lienzmuengz bae dajloengh lo. Mbouj geijnanz, vanj ngaiz deb byaek rangfwdfwd ndeu cuengq daengz dangqnaj gou lo. Gou heuh daxmeh itheij gwn ngaiz, daxmeh gangj caengz iek, hawj gou sien gwn, gangj dwk, de youh bae gueng vaiz lo. Gou gwn ngaiz ndei, daxmeh youh dwk raemxgoenj hawj gou gwn yw. Gou yawjraen daxmeh vih gou nyaengq bae ngaengq dauq, cungj goq mbouj ndaej gwn gaemz cuk gaem ngaiz ndeu, gig sinhoj, gou raemxda giengx le, got daxmeh naeuz:“Daxmeh, doiq mbouj gvaq, baez- laeng, gou caiq hix mbouj bae gij dieg yiemj haenx guhcaemz lo!”Daxmeh gaem fwngz iq gou naeuz:“Dahlwg ha, yienghneix couh doiq lo, mwngz rox lwi? Haetneix mwngz daj gwnz faex doek roengzdaeuj, daxmeh sim’in raixcaix.”

Daxmeh, mwngz cuengqsim ba, gou itdingh guh boux lwgnyez dingq vah ndeu.

(lauxsae son’gyauq Cinz Cinhdonz/覃珍团)