Daxbuz gou bineix ndaej 64 bi lo, byoem de hausagsag, naengnaj nyaeuqnyetnyet, hoeng de miz doiq fwngz youh hung youh giuj ndeu.

Daxbuz guh hongranz youh vaiq youh ndei. Mbouj saenq mwngz dingq, ranzdajcawj ngamqngamq cienz gij sing rek canj yiengj “gokgok” daeuj, yaepyet gwnzdaiz couh baij rim le gak cungj byaek ndeigwn lo. Baez nyouq daengz feihhom, aen dungx gou couh nyaenx mbouj ndaej yiengj “gugu” lo. Mwhneix, daxbuz couh yungh fwngz hung de lumh gyaeuj gou, naeuz: “Lan gvai, gwn lai di, maj sang di!” Yienghneix, gou couh hainduj gwnguk ndwnj nuem hwnjdaeuj lo.

Daxboh cam:“Daxbuz caeuq daxmeh byawz cauj byaek ceiq ndei gwn ha?” “Cungj ndei gwn!” Gou swnhbak dap coenz ndeu le youh gwnhung hwnjdaeuj. Dax- boh naeuz:“Nyinhcaen dap!” Gou fwtsiengj daengz aen geiq ndeu, riu dwk naeuz:“Daxbuz cawj haeux cauj byaek hawj daengx ranz vunz gwn, aen simsienh de hunghung, lumj daengngoenz; Daxmeh cij cawj hawj gou gwn, aen sim de beij daxbuz iq didi, lumj ronghndwen, ndigah naeuz cungj ndei gwn ha!” Dingq le gij hoizdap gvaicing neix, daengx ranz vunz cungj riu lo, faenfaen ngaekgyaeuj haenh gou.

(Hungz Swjyinh sij; Ouh Caijfangh hoiz)