Rumzsaeq cifefe, nditndat raeuj- rubrub. Youq ngoenzlijbai gyaeundei ndeu, gyoengq gicej iq ndaw gicej duenz Nanzningz haenx angqfwngfwng coh Nanzningz Yenzbozyenz bae lo!

Nanzningz Yenzbozyenz dieg youq gwnz Byasaeceij, Byasaeceij dieg youq henz Dahbetcik Yungh- ningz. Gizneix miz gij ronghsag faexva Cunghvaz, youh miz gij fungcingz diegwnq Dunghnanzya; mboujdan miz gij daegsaek saujsu minzcuz Boux- cuengh Dungcuz, hix miz gij gingjsaek rogdoengh maezvunz ranghdieg yayez- dai….

Yamq haeuj doumonz, boux gejgangj Siujliu dahcej neix daiq dou daeuj daengz aen gingjdenj daih’it——aen suen coengzlozhan. Dangqnaj, baenz go baenz go coengzlozhan ingj haeuj lwgda daeuj, gyoengqde mbouj lau rumz ci fwn fad, sangrad daengjdwd youq gwnz rin, youq gwn namh……cien yiengh fanh yiengh. Yawj! Miz mbangj lumj boux bing dawzsauq, giendingh cimyawj gizgyae; miz mbangj lumj boux vunzlaux simsoh, gwnz naj mumh raezrangrang; miz mbangj lumj bang lwgnyez ndeu, gangjvah cici caca, song boux sam laeq comz youq itheij……Siujliu dahcej neix youh daiq dou yawjngonz le go coengzlozhan ndaw guek ceiq hung haenx, go neix miz 7 mij sang bw! De couh lumj daxboh haujlai haujlai go coengzlozhan, riunyum- nyum heuh gyoengq lwgnyez loengx youq itheij.

Dou naengh hwnj gwnz ciyouz- yawj, gvaq le “Hangzcouh Sihhuz”, daeuj daengz aen gingjdenj wnq——aen gvangjcangz faexgeq. Ciuq gij eiqsei de naeuz, cungqgyang aen gvangjcangz neix miz go faexgeq baenz bak lai bi ndeu——go faex mak- gaivaiz 160 bi. Go faex makgaivaiz neix ndaej lix daengz bisoq yiengh- neix, caen dwg mbouj yungzheih. Faexgeq sang 15 mij, nyefaex yiet gvangq 22 mij, goekfaex hopraez 1.2 mij……160 bi gvaqdaeuj, hawj de deng gvaq geijlai hoenxciengq muz- lienh gaujniemh, yawjraen geij ciuh vunz majhung, gamjsouh hawsingz vaiqriengj fathwng…… gij naengfaex cocad dekceg haenx, ginglig le rumz- rumz fwnfwn, lumj najnyaeuq ityiengh, engq yienh’ok gij lauxgeq de daeuj, hawj vunz geiq maenh youq ndaw dungx.

Dou laebdaeb naengh hwnj gwnz ciyouzyawj, bae gamjsouh gij gingj- saek rogdoengh: Go neix dwg “roeg- gwnzmbwn”, lumj duznyungz iqetet; song go faex neix heuhguh “goreux gyaeundei”; benq neix dwg “nywj- naebieg”, gij saek de ndaw heu cab miz hoengzmaeq, ndaw hoengzmaeq cab miz hausag; gyoengq neix dwg go gosimmbwn gyaeundei; coij neix dwg faexsamoegraemx, ngamq did ndaej noengqndwdndwd; rangh neix dwg “faexriengbya”, gij mbaw de duix roengzdaeuj……

Daengngoenz doekroengz baih- sae, dou youzbyaij sat yenzbozyenz lo. Gou sij mbouj ndaej byaij ok yenzbozyenz, sim ngeix: Yenzbozyenz caen dwg vava loekloek, lai cungj lai yiengh, hawj vunz dava simmaez. Gou siengsaenq baezlaeng gizneix haengjdingh ciuyinx engq lai hekyouz, hawj gyoengqvunz doiq gak dieg fungcingz engqgya roxyiuj!

(Vangz Cihginz raiz; Goeng- gen hoiz）