Youq henz dabaeu de, miz sagrongh henj ndeu myab mbat ndeu. De ndwn youq mbouj ning mbouj cak. De mbouj hemq mbouj heuh. Gvaq yaep he, de couh lumj gofaex lejlej laemx roengz gwnz namh bae, mbouj ndwet saek sing nauq, aenvih gizneix dwg diegsa go.

Ngeihcib Caet

Daengz seizneix, roek bi gvaqbae gvaq……

Roek bi neix doxdaeuj, gou mbouj lwnh aen gojgaeq neix hawj bouxwnq nyi nauq. Gou dauqma seizde, gyoengq doengzdoih gou raen gou lij lix couh cungj angqfaengz lai. Hoeng gou couh doeknaiq lai, gou naeuz gyoengqde nyi ndwi:“Gou ndang fuengx lai go.”

Seizneix, gou yied ngoenz yied ndei, mbouj doeknaiq baenzlai le, hoeng gou lij caengz lumz Lwgvuengziq nauq. De gaenq dauqbae aen singgiuz de gvaq. Aenvih ngoenzde mbwn- momj, gou ra mbouj raen byukndang de lo. Byukndang de mbouj naek geijlai nauq……dajneix baenaj, gou couh gyaez gyanghaemh nyi ndaundeiq riuhehe, gyoengqde couh lumj ndaejnyi haj ik aen lingz……

Hoeng, lij miz aen saeh ndeu geizheih lai. Gou veh aenmomh hawj duzyiengz Lwgvuengziq mwhde, lumz veh sainaeng gvaq. Yienghneix Lwg- vuengziq couh daep aenmomh coq duzyiengz mbouj ndaej lo. Seizneix gou ciengzseiz boux vunz ndeu gag ngeix: Gwnz singgiuz de miz gijmaz saeh lwi? Duj va de dwg mbouj dwg deng duzyiengz gwn bae gvaq?

（42）