Aen haggeiz neix, Siujmingz yinx hwnj boujsaw vehveh. Mbouj- lwnh seizlawz, de cungj naemjgeiq yawj boujsaw vehveh.

Banhaet, Siujmingz aemq daehsaw bae yozyau. Gwnz gyangloh, de nyaenx mbouj ndaej gaem boujsaw vehveh okdaeuj, song fwngz gaem saw, itmienh byaij loh itmienh yawjsaw, dawz gij vah lauxsae caeuq daxboh daxmeh haenx“louzsim ancienz” lumz lo.

Cuengqhag ma daengz ranz le, gwn ngaiz seiz, Siujmingz youh nyaenx mbouj ndaej gij yaeuh boujsaw vehveh, dawz saw cuengq youq gwnz daiz, itmienh gwn ngaiz itmienh yawj saw, maez ndaej lienz byaek hix lumz nip lo. Daxboh raen le, unqswnh dwk gangj:“Siujmingz, ndeindei gwnngaiz, mbouj ndaej yawj saw, neix youh nguh siuvaq, youh haih lwgda.” Siujmingz mbouj dawz vah haeujrwz, lij dwg ngaemgyaeuj yawjsaw.

Banhaemh, aeu haeujninz lo, Siujmingz lij ninz youq gwnz congz yawj boujsaw vehveh diemzsubsub. Daxmeh daezsingj de:“Lwg ha, ninz lo.” Siujmingz lumjnaeuz dingq mbouj nyi, doengh hix mbouj doengh. Daxmeh najbaek naeuz:“Siujmingz, gaej yawj la, banngoenz yawj couh suenq lo, banhaemh lij ninz youq gwnz congz yawj dem, doiq lwgda mwngz couh yaek vaih lo.” Siujmingz ajbak dwk gangj:“Daxmeh, boujsaw vehveh neix caen mizyinx ha! Gou caiq yawj yaep ndeu dem.”

Yienghneix, Siujmingz lumz gwn lumz ninz, hwnzngoenz yawj boujsaw vehveh.

Doeklaeng, Siujmingz roxnyinh lwgda yawj doxgaiq mbouj cingcuj lo. De lau ndaej daejnga’nga hemq daxboh daxmeh. Daxboh daxmeh sikhaek daiq de bae yihyen. Canghyw vix gij cih gwnz silizbyauj cam:“Mwngz yawjraen aen cih ‘E’ neix lwi? Aen cih ‘E’ haibak yiengq baihlawz?” Siujmingz yunghrengz byaengq doiq lwgda ndeu, roxnyinh yawj mbouj cingcuj; de youh haengx hwnj doiq lwgda, hix yawj mbouj cingcuj. De cijndei luenh cai luenh gangj:“Lumj yiengq mbienghneix.”Yaep ndeu youh naeuz:“Lumj yiengq mbienghhaenx.”Canghyw ngauzngauz gyaeuj. Siujmingz ndawsim gig lau, raemxda lae roengzdaeuj lo. Canghyw doiq daxboh daxmeh naeuz:“Siujbaengz- youx lwgda mbouj ndei bw, dangh- naeuz caiq mbouj re, couh bienq- baenz ginsi lo.”

Siujmingz dingq le, gig ienqloek lo.

(lauxsae son’gyauq Cinz Caijfwnh/覃彩芬)